Тошкент телеминорасидаги байроқ янгиланди

Ижтимоий тармоқларда Тошкент телеминорасига ўрнатилган Ўзбекистон давлат байроғини алмаштириш жараёни акс этган видео тарқалди.

Видеода икки ходимнинг телеминора учида ишлаётганини тасвирланган.

Аввалроқ, Тошкентда 23 май куни телеминорани чақмоқ ургани ва унинг учидаги байроқ ёниб кетгани тўғрисида хабар берилганди. Ҳолат бўйича “Радиоалоқа, радиоэшиттириш ва телевидение маркази” минорани чақмоқ урмагани, балки “қизил чироқ шуъласи байроққа тушгани”ни маълум қилган эди.

ФВВ эса телеминорани чақмоқ урганини тасдиқлаб, иншоот бундай ҳолатларга қарши ҳимояга эга эканини маълум қилди.