Судгача Гулжаҳон Йўлдошевани айбдорга чиқарган прокурор Бош прокуратурага ишга ўтди
Чирчиқ шаҳар прокурори Бахтиёр Иброҳимов Бош прокуратуранинг бошқарма бошлиғи лавозимига тайинланди. Буни «Газета.uz»га Бош прокуратура матбуот котиби Ҳаёт Шамсутдинов тасдиқлади.
У Тошкент вилояти бош инфекционисти Гулжаҳон Йўлдошеванинг тергови якунланмасдан, ОАВларда айбдор деган фикрни илгари сургани билан кўпчилликка таниш.
Мазкур ҳолатга адвокат Усмонхон Салоҳиддинов: «Жиноят иши дастлабки босқичда эканини тан олган прокурор айблов судда нафақат тасдиқланиши, балки далиллар рад этилиши ҳам мумкинлигини билмайдими ёки била туриб, қонунга зид тарзда бўлса-да жамоат фикрини шакллантиришни, шу орқали судга таъсир ўтказишни мақсад қилганми?», — дея муносабат билдирганди.
Йўлдошеванинг адвокати Хушнуд Аҳроров, «Дастлабки тергов органи жиноят иши бошидан то якунига қадар ҳимоям остидаги Гулжаҳон Йўллдошевани нима бўлсада, айблашга қаратилганига гувоҳ бўлмоқдамиз», — дея айтганди.