Путин қандай таомларни хуш кўради? Президентнинг собиқ ошпазининг ҳақиқатлари
Бир неча йил Кремлда ошпаз бўлиб ишлаган француз Жером Риго Россия президентининг қандай таомларни хуш кўриши ҳақида сўзлаб берди.
Paris Match нашрига берган интервьюсида у Россия президенти гўштли таомларни хуш кўришини, 2008 йилдан 2012 йилгача президент бўлган, амалдаги Хавфсизлик кенгаши раиси ўринбосари Дмитрий Медведев эса шўртак-ширин соусли балиқни хуш кўришини айтган.
“Иш куним бошланишидан олдин армия шифокорлари лабораторияда маҳсулотларни текширишарди. Президентга таом тайёрлаш учун уларнинг рухсатини кутишим ва шифокорлар ҳамда ҳарбийлар кузатуви остида дастурхон тузардим”- деди ошпаз. Шунингдек, Риго 2 минг кишилик Россия элитасига дастурхон тузаганини, аммо давлат сирини ошкор эта олмаслиги сабаб, Кремлда ишлаган пайтидаги барча тафсилотларни ошкор қила олмаслигини айтган.
“Руслар жуда очиқкўнгил одамлар, улар соатлаб дастурхон устида ўтиришлари мумкин. Улар очлик нималигини жуда яхши билишади, шу сабаб ҳам ҳеч қачон нонни ташлаб юборишмайди ва нонни жуда эъзозлашади”- деди у.
Ошпаз россиялик ошпазларни нега Францияга таклиф этмасликларидан ҳайратда эканини яширмади. Унинг фикрича, россиялик ошпазлар юқори даражаларга эришган ва улар “Мишлен” юлдузига муносибдир.
Бундан аввал Россия етакчисининг матбуот котиби Дмитрий Песков президент овқат танлашда инжиқ эмаслиги, аммо хамирли таомларни кўп истеъмол қилмаслигини айтганди. Россия раҳбари либос танлашда ҳам инжиқ эмас.
