Немис модельери Карл Лагерфельднинг Париждаги квартираси аукционда 10 млн еврога сотилди
Немис модельери Карл Лагерфельднинг (1933-2019) Париждаги квартираси аукционда 10 миллион еврога сотилди. Бу ҳақда ТАСС хабар беради.
Le Parisien газетасининг хабар беришича, пойтахтнинг VII округидаги 260 квадрат метр майдонга эга футуристик услубдаги уч хонали квартира дастлаб 5,3 миллион еврога баҳоланган. Газетанинг таъкидлашича, бу модельернинг Париждаги асосий квартираси эди. У уни Стэнли Кубрикнинг "Космик Одиссей" (1968) асаридаги кема услубида лойиҳалаштирган. Меросхўрлар битимнинг шаффофлигини таъминлаш учун квартирани ким ошди савдосига қўйишга қарор қилди.
Paris Notaires нотариал хизмати томонидан ташкил этилган аукцион 19 дақиқа давом этди. Унда ҳаммаси бўлиб 30 киши иштирок этди ва 1 миллион евро миқдорида депозит талаб этилди. Харидор ҳақида инглиз тилида телефон орқали нарх белгилаганидан бошқа ҳеч қандай маълумот йўқ, деб ёзади нашр.
Лагерфельд 1933 йилда Гамбургда туғилган. У 14 ёшида Парижга кўчиб ўтди ва у ерда мода мактабида ўқиди. 1965 йилда Лагерфельд Chloe брендининг бош дизайнери бўлди ва Fendi билан узоқ муддатли ҳамкорликни бошлади. 1983 йилда у Chloeни тарк этди ва Chanel модалар уйига кўчиб ўтди ва у ерда 36 йил давомида бадиий раҳбар бўлиб ишлади. 1984 йилда модельер ўз номи билан кийим-кечак брендига асос солган. Лагерфельд фотография ва расмга ҳам қизиққан ва унинг кўргазмалари турли мамлакатларда бўлиб ўтган. У 2019 йил 19 февралда вафот этди. Publique журналига кўра, ўлимга ошқозон ости бези саратони сабаб бўлган.
