Маймунчечак қандай симптомларга эга?
Дастлабки аломатлар инфекция юққанидан кейин 5—21-куни пайдо бўлади. Аввалига симптомлар гриппни эслатади ва қуйидагича намоён бўлади:
- юқори ҳарорат;
- бош ва мушаклардаги оғриқлар;
- бел оғриғи;
- катталашган лимфа тугунлари;
- қалтираш;
- ҳолдан тойиш;
1-5 кундан кейин симптомларга тошма қўшилади. У юздан бошланиб пастки аъзоларга тушади.
Маймунчечак қандай юқади?
ЖССТ чечак одамдан одамга бемор билан яқин алоқалар орқали юқиши ҳақида огоҳлантиради:
- юзма-юз — инфекция ҳаво-томчи орқали;
- теридан терига — инфекция бемор терисининг зарарланган қисмлари билан терига тегганда, шу жумладан, жинсий алоқа пайтида;
- оғиздан оғизга — бир-бирини ўпганда юқади.
Бундан ташқари, вирус маълум вақт кийим ва уй-рўзғор буюмларида сақланиши, шунингдек, онадан ҳомилага ўтиши мумкин. Одатда касаллик 2 ҳафтадан 4 ҳафтагача давом этади.
Маймунчечакдан қандай ҳимояланиш мумкин?
Агар саёҳат қилишни режалаштираётган бўлсангиз, эҳтиёт чораларини билишингиз керак:
- Ёввойи дайди ҳайвонлар, хусусан, кемирувчилардан эҳтиёт бўлинг, айниқса, улар чечак тарқалган ҳудудларда яшаса ва носоғлом кўринишга эга бўлса. Уларнинг мурдасига тегманг ва ёввойи ҳайвон гўштини еманг.
- Зарарланган ҳайвон тегиши мумкин бўлган нарсаларга яқинлашманг.
- Умумий чойшаб ва гигиена буюмларидан фойдаланманг ва имкон қадар бемор одамлар билан яқин алоқада бўлманг.
- Гигиена қоидаларига риоя қилинг — қўлларни совунлаб ювинг ёки спиртли дезинфекцияловчи воситалардан фойдаланинг.
- Агар зарарланган одамларни парвариш қилсангиз, шахсий ҳимоя воситаларидан фойдаланинг.