ЖИБ М.Улуғбек туман судида 2021 йилнинг 5 ойи давомида амалга оширилган ишлар юзасидан брифинг бўлиб ўтди

Бугун, 28 июнь куни Тошкент шаҳрида жиноятларни жиловлаш, жиноятчилик профилактикасини янада такомиллаштириш, одил судловни таъминлаш ва коррупциядан ҳоли худудга айлантириш бўйича “Йўл харитаси”да белгиланган вазифалар ижроси доирасида судлар фаолиятининг очиқлиги, ошкоралиги ва шаффофлигини ошириш мақсадида жиноят ишлари бўйича М.Улуғбек туман судида 2021 йилнинг 5 ойи давомида амалга оширилган ишлар юзасидан маълумот бериш мақсадида брифинг бўлиб ўтди.

Унда ЖИБ М.Улуғбек туман суди раиси Шуҳрат Бакаев, фуқаролик ишлари бўйича М.Улуғбек туманлараро суди раиси Шерзод Ражабов, Тошкент туманлараро иқтисодий суди раиси Сарвар Солиев ва Тошкент туманлараро маъмурий суди судьяси Маъруфжон Эргашев қатнашишди.

Хабарингиз бор, “Судлар тўғрисида”ги Қонунининг 37-моддасига асосан, давлат органларининг, фуқаролар ўзини ўзи бошқариш органларининг, шунингдек улар мансабдор шахсларининг хатти-ҳаракатлари (қарорлари) устидан берилган, оммавий-ҳуқуқий муносабатлардан келиб чиқадиган шикоят ва аризалар бўйича маъмурий низолар билан боғлиқ ишлар, Тошкент туманлараро маъмурий судлари судловига тааллуқли ҳисобланади.

Брифингда таъкидланишича, Тошкент туманлараро маъмурий суди томонидан 2021 йил 5 ойи давомида оммавий-ҳуқуқий муносабатлардан келиб чиқадиган 800 та иш кўриб тамомланган. Шундан, 436 таси қаноатлантирилган (212 таси рад қилинган, 104 таси иш юритишдан тугатилган, 48 таси кўрмасдан қолдирилган).

Тошкент туманлараро маъмурий суди судьяси Маъруфжон Эргашев 2021 йилнинг 5 ойи давомида айнан қайси маъмурий органлар мансабдор шахсларининг хатти-ҳаракатларини ғайриқонуний деб топиш билан боғлиқ ишлар нисбатан кўпроқ кўрилгани хусусида тўхталди:

• Бюджетдан ташқари пенсия жамғармаси мансабдор шахсларининг хатти-ҳаракатларини ғайриқонуний деб топиш, уларнинг қарорларини ҳақиқий эмас деб топиш юзасидан 277 та иш кўрилган. Шундан 255 таси қаноатлантирилган, 9 таси рад қилинган,8 таси кўрмасдан қолдирилган, 5 таси иш юритишдан тугатилган;
• Ҳокимият мансабдор шахсларининг хатти-ҳаракатларини ғайриқонуний деб топиш
  ва ҳоким қарорларини ҳақиқий эмас деб топиш юзасидан 195 та иш кўрилган. Шундан,
  75 таси қаноатлантирилган, 78 таси рад қилинган, 19 таси кўрмасдан қолдирилган,
  22 таси иш юритишдан тугатилган
• Давлат солиқ органлари мансабдор шахсларининг хатти-ҳаракатларини ғайриқонуний деб топиш, уларнинг қарорларини ҳақиқий эмас деб топиш юзасидан 89 та иш кўрилган. Шундан, 38 таси қаноатлантирилган, 18 таси рад қилинган, 3 таси кўрмасдан қолдирилган, 31 таси иш юритишдан тугатилган (ДСИ билан 2 марта учрашув ўтказилди, НДС масаласи);
• Адлия органлари (нотариус, ФҲДЁ, давлат хизматлари агентлиги ва б.) мансабдор шахсларининг хатти-ҳаракатларини ғайриқонуний деб топиш, уларнинг қарорларини ҳақиқий эмас деб топиш юзасидан 30 та иш кўрилган. Шундан, 17 таси қаноатлантирилган, 10 таси рад қилинган,2 таси кўрмасдан қолдирилган, 1 таси иш юритишдан тугатилган.

— Шу билан биргаликда муайян яшаш жойига эга бўлмаган шахсни реабилитация марказига жойлаштириш билан боғлиқ жами 461 та илтимоснома кўрилган бўлиб, шундан 441 та илтимоснома қаноатлантирилган, 20 та илтимоснома рад этилган. Бугунги кунда мазкур тоифа ишлари тасдиқланган ички жадвал асосида судьялар томонидан Реабилитация марказида махсус жиҳозланган хонада сайёр кўрилмоқда.

2021 йил 5 ойи давомида апелляция инстанциясида жами 272 та оммавий ҳуқуқий муносабатлардан келиб чикадиган ишлар кўрилган. Шундан, 197 та иш ўзгаришсиз қолдирилган, 8 та иш ўзгартирилган, 62 та иш бекор қилинган, 5 та иш юритишдан тугатилган.

Тошкент туманлараро маъмурий суди томонидан аҳолини ҳуқуқий маданиятини ошириш, ҳуқуқбузарликларни олдини олиш борасида ҳам бир қатор тадбирлар амалга оширилган.

Тошкент туманлараро маъмурий суди томонидан жами 92 та хусусий ажрим чиқарилган. Шундан, 37 таси тегишли ташкилотларда муҳокама қилиниб, судларга жавоблари берилган бўлиб, қолган 55 тасининг жавоблари берилмаган (булар бўйича тегишли эслатма хатлар юборилган).

2021 йил 5 ойи давомида Тошкент туманлараро маъмурий судига жами 96 та мурожаатлар келиб тушган. 4 та мурожаат тааллуқлиги бўйича юборилган. Шундан, 82 та мурожаатларга ўрганиб жавоб берилган. Шундан, 40 та ижобий ҳал қилинган, 42 та қонуний ҳуқуқлари тушунтирилган, рад этилган мурожаатлар мавжуд эмас. Келиб тушган ҳар бир мурожаатни ҳисобга олиш, унинг ҳаракати ва белгиланган муддатида кўриб чиқилиши устидан назорат кучайтирилган, - дейди Тошкент туманлараро маъмурий суди судьяси Маъруфжон Эргашев.

13 402 ТА ИШЛАРНИНГ 4 579 ТАСИ ЁКИ 34,1 ФОИЗИ САЙЁР СУД МАЖЛИСЛАРИДА ҲАЛ ЭТИЛГАН

Тошкент туманлараро иқтисодий суди томонидан эса 2021 йилнинг 5 ойи давомида одил судловни амалга ошириш фаолияти давомида фуқаролар, тадбиркорлик субъеклари ва юридик шахсларнинг бузилган ҳуқуқлари, эркинликлари ҳамда қонуний манфаатларини ҳимоя қилишга, қонун устуворлигини таъминлашга ҳамда мамлакатнинг инвестициявий жозибадорлигини мустаҳкамлашга эътибор қаратилганига урғу берилди.

Брифингда маълум бўлишича, ҳисобот йили даврида жами 18 672 та даъво аризалар келиб тушган. Ўтган йилдан 2021 йилга қолдиқ бўлиб ўтган ишлар сони 1 963 тани ташкил этган.

— 13 464 таси иш юритишга қабул қилиниб, ҳисобот даврининг охирига қадар 13 402 таси кўриб чиқилган, шундан 27 та суд буйруғи берилган. Кўриб чиқилган ишларнинг 10 951 таси бўйича даъво талаби қаноатлантирилган, 1 689 таси бўйича даъво талабини қаноатлантириш рад этилган, 420 таси (113 таси келишув битими асосида) бўйича иш юритиш тугатилган, 342 та даъво аризаси (ариза) кўрмасдан қолдирилган. Ўртача ойлик иш ҳажми Тошкент туманлараро иқтисодий судида 191 тани ташкил қилган, - дейди Тошкент туманлараро иқтисодий суди раиси Сарвар Солиев.

Мирзо Улуғбек туманида жойлашган тадбиркорлик субъектлари томонидан Тошкент туманлараро иқтисодий судига 2021 йилнинг 5 ойида жами 2061 та даъво аризалар кўрилгани маълум қилинди. Шундан,

• 1679 таси қаноатлантирилган,
• 18 таси бўйича банкрот деб топилган,
• 240 таси рад қилинган,
• 32 таси бўйича кўрмасдан қолдирилган,
• 57 таси бўйича (шундан 9 таси келишув битими асосида) иш юритиш тугатилган,
• 34 таси мазмун кўриб чиқиш бошқа судга юборилган (Тошкент шаҳар судининг иқтисодий ишлар бўйича судлов ҳайъатига банд солиш билан боғлиқ ишлар),
• 1 таси бўйича иш юритиш тўхтатилган.

Мирзо Улуғбек туманида жойлашган тадбиркорлик субъектлари томонидан судга даъво аризаси берганда 1.126,79 млн.сўм миқдорида республика бюджетига давлат божи ихтиёрий тўлаган, 9.181,02 млн.сўм миқдорида давлат божи суд қарорига асосан республика бюджетига ундириб олинган.

Бундан ташқари, даъвогарлар фойдасига ишни кўриш натижаси бўйича 227.432,97 млн.сўм миқдорида қарздорлик суммасини ундириш юзасидан суд ҳужжати чиқарилган.

Қайд этилишича, жами 520 та суд мажлиси видеоконференцалока режимида ўтказилган. Ишда иштирок этувчи шахсларнинг 890 нафар вакили ўзлари жойлашган ҳудудлардан чиқмаган ҳолда, видеоконференцалоқа режимида ўтказилган суд мажлисларида қатнашиб, уларнинг 178 млн. сўмдан ортиқ маблағлари тежаб қолинган.

Суд мажлисларининг тарбиявий ва профилактик аҳамиятини ошириш, томонларга суд процессида қатнашиб, хуқуқ ва манфаатларини ҳимоя қилишлари учун қулайлик яратиш мақсадида 13 402 та ишларнинг 4 579 таси ёки 34,1 фоизи сайёр суд мажлисларида ҳал этилган. Ҳал этилган ишлар бўйича даъвогар (аризачи)лар фойдасига 1.861.628 млн. сўм ундирилган. Ҳал этилган ишлар бўйича республика бюджетига 58.987,73 млн. сўм божи ундириш тўғрисида суд ҳужжатлари қабул қилинган.

Тарафлар томонидан ишни судда кўриш учун ихтиёрий тўланган давлат божи суммаси 8.911,26 млн. сўмни ташкил этган.

Шунингдек, Тошкент туманлараро иқтисодий суди раиси Сарвар Солиев иқтисодий судлар томонидан ишларни кўриш жараёнида аниқланган қонунбузилиши ҳолатлари юзасидан айбдор мансабдор шахсларга нисбатан 45 та таъсир чораси қўлланилгани, хусусан, 3 та маъмурий, 2 та моддий, 38 та интизомий чора қўллаш ҳақида ҳамда аникланган қонунбузарликларнинг олдини олиш ва келгусида такрорланмаслиги юзасидан эса 2 та хусусий ажрим ва тақдимномалар чикарилганига ҳам тўхталиб ўтди.

Тадбиркорлик субъектларидан иқтисодий судларга электрон шаклда юборилган даъво аризалари 4 515 тани ташкил этган. Иқтисодий судларда умумий кўрилган ишлар сони ўтган йилга нисбатан 52,9 фоизга кўпайган бўлиб, суд қарорлари устидан шикоятлар келиши ҳам мос равишда кўпайган.

— Жумладан, апелляция инстанция суди томонидан 2021 йилнинг биринчи чорагида 307 та иш кўриб чиқилган. Кўрилган ишлар сони ўтган йилга нисбатан 149 тага ёки 94,3 фоизга кўпайган. Апелляция инстанциясида 479 та иқтисодий иш қайта кўрилган бўлиб, шундан 341 таси ёки 71,1 фоизи ўзгаришсиз қолдирилган, 74 таси ёки 15,4 фоизи бекор қилинган, 64 таси ёки 13,3 фоизи ўзгартирилган.

Кассация инстанция суди томонидан 2021 йилнинг 5 ойи давомида 150 та иш кўриб чиқилган. Кассация инстанциясида қайта кўрилган суд ҳужжатларининг 94 таси ёки 62,6 фоизи ўзгаришсиз қолдирилган, 34 таси 22,6 фоизи бекор қилинган, 22 та 14,6 фоиз ўзгартирилган, - дейди Тошкент туманлараро иқтисодий суди раиси.