Канада АҚШга зарба берди

10 март, душанба куни Канаданинг Онтарио вилояти ҳукумати АҚШнинг учта штатига электр энергияси нархини оширди. Қўшни давлатларни электр энергиясиз қолдириш билан Канада вилояти бош вазири Даг Форд таҳдид қилганини Bloomberg хабар бермоқда.

Онтарио ҳукумати Мустақил электр энергетика тизими операторига Миннесота, Мичиган ва Ню-Йоркга экспорт қилинадиган электр энергияси нархига ҳар бир мегаватт-соат учун 10 Канада доллари (7 АҚШ доллари) қўшишни буюрди. Бу жорий нархларга нисбатан 25 фоизлик ўсишни ташкил этди. Қарор АҚШ президенти Доналд Трамп маъмурияти Канададан келтирилаётган деярли барча маҳсулотларга божхона тўловларини оширгани билан изоҳланмоқда.

Таҳлилчиларнинг таъкидлашича, Онтарио қарори кўпроқ рамзий аҳамиятга эга, чунки АҚШдаги электр энергияси спот бозорлари ва вилоятлар ўз электр энергиясини сотадиган биржалардаги нархлар талаб ва таклифга асосланади. Охирги харидорлар сотувчилар рўйхатидан танлаб олишлари мумкин ва Онтарио нархининг кўтарилишига рози бўлишлари шарт эмас. Бироқ, маҳаллий ҳокимият шу йўл билан кунига 400 минг Канада долларигача маблағ топишни режалаштирмоқда - бу пул Онтарио ишчилари, оилалари ва корхоналарини қўллаб-қувватлаш учун сарфланади.

Bloomberg маълумотларига кўра, 2023 йилда Ню-Йорк истеъмол қилинган электр энергиясининг атиги 4,4 фоизини Канададан импорт қилган. Бошқа штатлар қўшни мамлакатдан ундан ҳам камроқ миқдорда электр энергияси сотиб олади.

Трамп аллақачон Мексика, Канада ва Хитойдан АҚШга киритилаётган товарларга мос равишда 25, 25 ва 20 фоизлик божлар жорий этган. Шунингдек, Оқ уй раҳбари Европа Иттифоқи мамлакатларидан келтирилаётган барча товарларга, жумладан, озиқ-овқат ва автомобилларга ҳам 25 фоизлик божлар киритиш билан таҳдид солган. Бунга жавобан Канаданинг собиқ бош вазири Жастин Трюдо мамлакат 155 миллиард долларлик Америка товарларига 25 фоизлик божлар жорий этишини ва АҚШнинг ҳозирги чоралари бекор қилинмагунча уларни ўзгартирмаслигини ваъда қилган.