Будапешт шаҳрида консуллик-ҳуқуқий соҳадаги Ўзбекистон-Венгрия маслаҳатлашувларининг биринчи давраси бўлиб ўтди
Кеча Будапешт шаҳрида консуллик-ҳуқуқий соҳадаги Ўзбекистон-Венгрия маслаҳатлашувларининг биринчи давраси бўлиб ўтди, деб хабар қилмоқда "Дунё" АА мухбири.
Ўзбекистон делегациясига ТИВнинг Консуллик-ҳуқуқий департаменти бошлиғи ўринбосари Рустам Назаров, Венгрия томонига Ташқи ишлар ва савдо вазирлиги Консуллик департаменти директори Балазс Фаркаш бошчилик қилди.
Тадбирнинг очилишида Венгрия Ташқи ишлар ва савдо вазирлиги давлат котиби ўринбосари Адам Стифтер ва Ўзбекистон элчиси Ойбек Шахавдинов иштирокчиларни қутладилар.
Маслаҳатлашувлар давомида томонлар консуллик соҳасидаги икки томонлама ҳамкорликни чуқурлаштириш, хусусан, фуқароларнинг ўзаро саёҳатларини осонлаштириш, консуллик масалалари бўйича ҳуқуқий базани янада кенгайтириш, шунингдек, икки давлат ҳудудидаги ватандошлар ва юридик шахслар ҳуқуқ ва манфаатларини ҳимоя қилиш масалаларини муҳокама қилдилар.
Тадбир давомида Ўзбекистон томони мамлакатимизда консуллик-ҳуқуқий соҳани такомиллаштириш, хусусан, Ўзбекистон фуқароларига хориждаги консуллик хизматларини кўрсатиш бўйича ТИВ фаолиятига замонавий ахборот-коммуникация технологияларини жорий этиш ва чет эл фуқароларининг Ўзбекистонда бўлиши, консуллик хизматларини босқичма-босқич электрон форматга ўтказиш, виза режимини либераллаштириш, шунингдек, Ўзбекистоннинг хорижий муассасалари томонидан ҳайдовчилик гувоҳномалари, электрон рақамли имзо ва ПИНФЛ тақдим этилишини бошлаш бўйича амалга оширилаётган чора-тадбирлар ҳақида батафсил маълумот берди.
Томонлар икки давлат ташқи ишлар вазирликлари ўртасида ушбу консуллик маслаҳатлашувлари илк бор ўтказилаётгани ва бу икки давлат идоралари ўртасида ҳамкорликни мустаҳкамлаш ҳамда яқин алоқаларни ўрнатишга хизмат қилишини таъкидладилар.
Музокаралар якунлари бўйича томонлар консуллик масалалари бўйича ҳамкорликни мунтазам равишда янада мустаҳкамлаш ва кенгайтиришга тайёр эканликларини тасдиқладилар.
Шунингдек, томонлар 2025 йилда Ўзбекистонда консуллик хизматлари раҳбарлари даражасида консуллик маслаҳатлашувларининг иккинчи даврасини ўтказиш тўғрисида келишиб олдилар.
