Россияда муҳожирлар учун рус тилидан имтиҳон топшириш қоидалари кучайтирилмоқда
Мигрантларни имтиҳондан ўтказувчи 12 та университетнинг барчаси тижорат ҳамкорлари билан шартномаларини бекор қилган.
Россиядаги мигрантлар энди тижорат ташкилотларида рус тилидан имтиҳон топшира олмайди. Россия Федерацияси Таълим ва фан вазирлиги тест синовларини ўтказиш ҳуқуқига эга бўлган 12 та олий ўқув юрти ўз ҳамкорлари билан тузилган барча шартномаларни бекор қилганини маълум қилди, деб ёзади «Газета.ру».
«Шундай қилиб, таълим ташкилотлари номидан имтиҳонларни тижорат платформаларида ўтказиш тўхтатилди. Энди хориж фуқаролари учун имтиҳонларни фақат университетлар ва бошқа давлат ва шаҳар ташкилотлари ўтказади. Бунинг учун платформалар барча ҳудудларда пайдо бўлади. Ваколатли олий ўқув юртлари тегишли келишувларни якунламоқда», — дейилади Таълим ва фан вазирлиги хабарида.
Россия Федерациясида Таълим ва фан вазирлигига бўйсунадиган тўққизта университет, иккита давлат университети, таълим вазирлигининг битта университети ва Москва ҳукуматининг бир ташкилоти рус тилидан чет тили сифатида имтиҳон топшириш ҳуқуқига эга.
Россиядаги мигрантлар учун имтиҳонларга ўзгартиришлар киритилиши мумкин
Россия Федерацияси фан ва олий таълим вазири Валерий Фалков 18 апрель куни бўлиб ўтган йиғилишда университетлар томонидан ҳамкор ташкилотлар асосида имтиҳон ўтказилишини янада эҳтиёткорлик билан назорат қилиш зарурлигини айтди.
Фалковнинг буйруғига қадар чет элликлар Россиянинг 12 та университетларида ва битта Москва давлат ташкилотида, шунингдек, аккредитациядан ўтган университетлар билан шартнома тузган тижорат фирмаларида рус тилидан имтиҳон топширишлари мумкин эди.
РБK хабарига кўра, бундай ташкилотлар орасида хусусий ҳужжатларни таржима қилиш агентликлари ва мигрантларга ҳуқуқий ёрдам марказлари ҳам бор. Уларнинг аниқ сони номаълум.
