Бош эпидемиолог: "Мамлакатда коронавирус эпидемияси иккинчи тўлқинининг бошланиши эҳтимоли жуда кам"
Хитойда COVID-19 инфекциясининг тарқалиши билан боғлиқ иккинчи тўлқиннинг бошланиш эҳтимоли жуда паст баҳоланмоқда. Бу ҳақда мамлакатнинг етакчи эпидемиологи Чжун Наншан маълум қилди, деб хабар берган «Интерфакс».
«Хитойдаги эпидемияга қарши тизим ва кўрилган кураш чораларини инобатга олиб мамлакатда коронавирус эпидемиясининг иккинчи тўлқини бўлишининг эҳтимоли жуда камлигини айта оламан», – деган Чжун Наншан.
Хитойнинг бош эпидемиологи коронавирусга қарши чора-тадбирлар грипп инфекциясига қарши туришда ҳам бир хил самара беришини қайд этди.
Пандемия бошланганидан буён Хитойда 85 минг нафар киши коронавирус инфекциясига чалинган, 4,6 мингдан зиёд бемор касаллик асоратлари оқибатида вафот этган. Хитойда охирги бир сутка ичида 30 октябрь ҳолатига кўра 25 та янги касалланиш ҳолати қайд этилган.
