БМТ: 130 давлатга ҳалигача вакцина етиб бормади
БМТ Бош котиби Антониу Гутерриш дунёда коронавирус вакцинасининг тақсимоти тенг ва адолатли эмаслигини танқид қилди, дея хабар бермоқда Deutsche Welle.
Гутерришнинг айтишича, шу пайтгача ишлаб чиқарилган дозаларнинг 75 фоизи атиги 10 та мамлакатга юборилган, дунёнинг 130 мамлакатига эса ҳали вакцина умуман етиб боргани йўқ. “Вакцина тақсимотида тенгликнинг таъминланиши халқаро ҳамжамият олдидаги энг катта ахлоқий имтиҳондир”, – деди БМТ раҳбари.
Антониу Гутерриш ривожланган давлатларга мурожаат қилиб, глобал миқёсда вакцина кампанияси ўтказилишини сўради. Унинг фикрича, G20 давлатлари бундай кампанияни режалаштириши, амалга ошириши ва молиялаштириши мумкин, глобал вакцина стратегиясининг ишлаб чиқиши ривожланган давлатларнинг ўзи учун ҳам фойдали бўлади.
“Дунёнинг жанубида вирус яшин тезлигида тарқалаверса, у мунтазам равишда мутацияга учрайверади. Янги вариантлар янада тезроқ юқиши ва янада ҳалокатли бўлиши, мавжуд вакциналарнинг самарадорлигига салбий таъсир қилиши мумкин”, – деди Гутерриш.
