“Барселона” клублар ўртасидаги жаҳон чемпионатида иштирок этиш имкониятидан маҳрум бўлди

Испаниянинг “Барселона” ҳамда Франциянинг “ПСЖ” клублари тўқнаш келган Чемпионлар лигаси 1/4 финалининг жавоб учрашуви 16 апрель куни якунланди. Учрашувда “ПСЖ” “Барселона”ни 4:1 ҳисобида мағлуб этди (умумий ҳисоб — 6:4).

Шу тариқа Каталония жамоаси Чемпионлар Лигасининг ярим финалига чиқа олмай, турнирни тарк этди.

Парижликлар билан қарама-қаршилик натижаси “Барселона”га клублар ўртасидаги жаҳон чемпионатига чиқишга имкон бермади. Хави шогирдлари рейтинг очколари бўйича Мадриднинг “Атлетико” клубидан ўтиб кета олмади. “Барселона” турнирда иштирок этиш учун Чемпионлар Лигасида Диэго Симеоне шогирдларидан яхшироқ натижа қайд этиши жоиз эди.

Эслатиб ўтамиз, 2025 йилги клублар ўртасидаги жаҳон чемпионати 2025 йилнинг 15 июнидан 13 июлига қадар АҚШда бўлиб ўтади. Турнирда “Реал Мадрид” ва “Атлетико Мадрид”, “Манчестер Сити” ва “Челси”, Германия чемпионати вакиллари “Бавария” ва “Боруссия Дортмунд”, Италиянинг “Интер” ва “Ювентус” ҳамда Франциянинг “ПСЖ клуби, шунингдек, Португалиянинг “Бенфика” ва “Порту” клублари иштирок этади.