АҚШ долларининг сўмга нисбатан расмий курси 2021 йил давомида 360 сўм 74 тийинга ошган
Ўзбекистон Республикаси Марказий банки 2021 йил 30 декабрь куни якунида валюта биржаси савдолари натижаларидан келиб чиқиб, хорижий валюталарнинг, шу жумладан АҚШ долларининг сўмга нисбатан қийматини эълон қилди. Бу - 2021 йилдаги сўнгги валюта курси белгиланиши бўлиб, йил якунидаги АҚШ доллари курси 10 837,66 сўм бўлди.
АҚШ долларининг расмий курси 2021 йил бошида (1 январь ҳолатига) 10 476,92 сўм бўлганини инобатга олсак, сўмнинг АҚШ долларига нисбатан йиллик қадрсизланиши 360 сўм 74 тийинни, ёки 3,44 фоизни ташкил қилган.
2021 йилда сўмнинг АҚШ долларига нисбатан қадрсизланиш даражаси, сўнгги йилларнинг энг паст кўрсаткичи эканлигини ҳам қайд этиш лозим. Жумладан, АҚШ доллари курсининг сўмга нисбатан ўсиш даражаси 2020 йилда 10,2 фоизни (959,36 сўм), 2019 йилда эса 14,05 фоизни (1'171,31 сўм) бўлган эди.
