Zelenskiy: Ukraina xavfsizligining eng muhim kafolati —Evropa Ittifoqiga a’zo bo‘lish

Ukraina prezidenti Vladimir Zelenskiyning ta’kidlashicha, mamlakat xavfsizligini ta’minlashdagi eng muhim va asosiy kafolat — Ukrainaning Yevropa Ittifoqiga to‘laqonli a’zo bo‘lishidir. Unga ko‘ra, kelajakdagi xavfsizlik kafolatlari kompleks, huquqiy jihatdan mustahkam va xalqaro darajada kafolatlangan bo‘lishi lozim.

Bu haqda Zelenskiy Kiyevda NATO bosh kotibi Mark Ryutte bilan o‘tkazilgan qo‘shma matbuot anjumanida ma’lum qildi, deb xabar beradi Report agentligining Sharqiy Yevropa byurosi.

Prezidentning aytishicha, faqat harbiy yordam bilan urush tugadi, deb hisoblab bo‘lmaydi. “Gap faqat qurol-yarog‘ yoki mudofaa yordami haqida emas. Masala Rossiya agressiyasini oldini oladigan va keng ko‘lamli bosqinning qayta takrorlanishini istisno qiladigan uzoq muddatli tizimni shakllantirishda”, — dedi Zelenskiy.

Uning ta’kidlashicha, shunday kafolatlarning eng muhim tarkibiy qismi Ukraina uchun Yevropa Ittifoqiga to‘laqonli a’zo bo‘lish hisoblanadi. “Aynan Yevropa Ittifoqi Ukrainaga uzoq muddatli istiqbolda tashqi tahdidlardan ishonchli siyosiy, iqtisodiy va huquqiy himoyani ta’minlay oladi”, — deya qo‘shimcha qildi u.