Yunusobod va Mirzo Ulug‘bek tumanlarida kommunal to‘lovlar uchun undirilgan pullarni o‘zlashtirgan shirkatlar aniqlandi

Bosh prokuratura huzuridagi Departamentning Yunusobod tuman bo‘limi tomonidan fuqarolarning huquq va manfaatlarini himoya qilish yuzasidan o‘tkazilgan tergovga qadar tekshiruvda, “S.K.” xususiy uy-joy mulkdorlari shirkati moddiy javobgar shaxslari xonadon egalaridan kommunal to‘lovlari uchun undirilgan jami 269,8 mln so‘mni bank kassasiga kirim qilmasdan, talon-toroj qilganliklari aniqlangan.

Shu kabi, Mirzo Ulug‘bek tuman bo‘limi tomonidan o‘tkazilgan tergovga qadar tekshiruvda, “G‘.S.” xususiy uy-joy mulkdorlari shirkati rahbari D.S. aholidan kommunal to‘lovlari uchun undirilgan 95,2 mln so‘m naqd pulni o‘zlashtirish yo‘li bilan talon-toroj qilganligi aniqlangan.

Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishlari qo‘zg‘atilib, tergov harakatlari o‘tkazilmoqda.