Xitoydagi yaponiyaliklar ogohlantirildi

Xitoyda 13 dekabr “Nankin qirg‘ini”ni xotirlash kuni yaqinlashar ekan, u yerdagi Yaponiya elchixonasi va konsulliklari mahalliy hukumat va polisiyadan yaponiyaliklarning Xitoydagi xavfsizligini ta’minlashni so‘radi.

Yaponiyaning yahoojapan ommaviy axborot vositalariga ko‘ra, Yaponiyaning Xitoydagi elchixonasi yaqinda Xitoyda yashovchi yaponiyaliklarni o‘z xavfsizligiga e’tibor berishlari haqida ogohlantirgan.

“13 dekabr “Nankin qirg‘ini”ni xotirlash kuni. Ushbu kunlarda Xitoydagi barcha yapon fuqarolari tashqariga chiqayotganda o‘z-o‘zini himoya qilishga har qachongidan ham ko‘proq e’tibor berishlari kerak. Atrofingizdan ehtiyot bo‘ling va xavfsizlikni ta’minlang, ayniqsa bolalaringizni ko‘chaga olib chiqishda tegishli ehtiyot choralarini ko‘ring”, – deyiladi Yaponiyaning Xitoydagi elchixonasi bayonotida.

Elchixona Xitoydagi yapon fuqarolariga omma oldida yapon tilida gapirishni minimallashtirishni maslahat beradi. Bundan tashqari, Yaponiya fuqarolariga yaponiyalik ekanligini osongina aniqlash mumkin bo‘lgan kiyim-kechak va narsalarni kiyish yoki olib yurishdan qochish tavsiya qilindi.

OAV ma’lumotlariga ko‘ra, Yaponiya elchixonalari va konsulliklari Xitoy mahalliy hukumati va polisiyasidan “Nankin qirg‘ini”ni xotirlash chog‘ida Xitoydagi yapon fuqarolarini himoya qilish choralarini kuchaytirishni so‘ragan.

Xitoy hukumati ruxsatiga ko‘ra, har yili 13 dekabr “Nankin qirg‘ini qurbonlari uchun motam kuni” sifatida nishonlanadi. Ikkinchi jahon urushi yillarida yapon qo‘shinlari Xitoyning o‘sha paytdagi poytaxti Nankinni egallab, u yerda ko‘plab tinch aholini o‘ldirgan.