Superligada 28-turning so‘nggi o‘yini o‘tkazildi

Superliganing 28-turi doirasida Termizdagi «Voha derbisi» kutilganidek jonli va kurashlarga boy tarzda o‘tdi. «Surxon» va «Sho‘rtan» jamoalari o‘rtasidagi bahsda yakka gol taqdirni hal qildi.

Boshidanoq tashabbus termizliklar qo‘lida bo‘ldi. Ilk daqiqalardanoq hujumkor o‘yin namoyish etgan «Surxon» bir necha bor hisobni ochish imkoniga ega bo‘ldi. 7-daqiqada Muhammad-Ali Abdurahmonovning zarbasini raqib posboni Eshbo‘tayev qaytardi. Oradan biroz vaqt o‘tib, Asadbek Karimovning zarbasi darvoza yonidan o‘tib ketdi.

18-daqiqada Sunatilla Poyonovning jarima zarbasi jonli devorga tegib maydondan chiqib ketgan bo‘lsa, 27-daqiqa esa Rustam Turdimurodovning uzoq masofadan yo‘llagan kuchli zarbasini Eshbo‘tayev mo‘’jiza bilan qaytardi. 29-daqiqada «Sho‘rtan» tomonidan kiritilgan to‘p ofsayd sababli hisobga olinmadi.

Birinchi bo‘limda «Surxon» bir necha xavfli hujumlar tashkil etgan bo‘lsa-da, gol kiritish imkonini topa olmadi. Tanaffusga jamoalar 0:0 hisobida chiqishdi.

Ikkinchi taymda ham termizliklar tashabbusni saqlab qolishdi. 55 va 60-daqiqalarda Nodirbek Abduxoliqovning zarbalari xavfli chiqdi, ammo raqib darvozaboni bu safar ham ishonchli o‘ynadi.

82-daqiqada esa asosiy voqea ro‘y berdi — Rustam Turdimurodovning aniq uzatmasidan keyin zaxiradan maydonga tushgan Sarvar Abduhamidov darvozani ishg‘ol qildi — 1:0!

Shundan so‘ng «Surxon» hisobni saqlab qolishga e’tibor qaratdi. 90+6-daqiqada posbon Yo‘ldoshevning muhim seyvi jamoani so‘nggi daqiqalarda qutqarib qoldi.

Shu tariqa, «Surxon» muhim g‘alabani qo‘lga kiritdi va o‘z ochkolarini 31 taga yetkazdi.

Superliga, 28-tur
10 noyabr 2025 yil. Termiz. «Surxon» stadioni.
SURXON - SHO‘RTAN - 1:0
Gol: Sarvar Abduhamidov, 82 (1:0)
Ogohlantirishlar: Behruz Karimov (50), Nodirbek Abduxoliqov (63), Dilshod Yo‘ldoshev (90+).