Rossiyaning Ivanovo viloyatida O‘zbekiston Savdo-sanoat palatasining Savdo uyi ochildi
Tantanali ochilish marosimida O‘zbekiston elchisi Botirjon Asadov, Ivanovo viloyati hukumati vakillari, Savdo-sanoat palatasi rahbariyati, shuningdek, mazkur viloyat ishbilarmon doira vakillari qatnashdi.
Savdo uyi O‘zbekiston va Rossiya hududlari o‘rtasida o‘zaro tovar ayirboshlash hajmini oshirish va hamkorlikni yo‘lga qo‘yish maqsadida tashkil etildi. Unda "Made in Uzbekistan" yorlig‘i ostidagi O‘zbekiston sanoatining keng assortimentidagi yuqori sifatli hamda raqobatbardosh mahsulotlari taqdim etiladi va sotiladi.
Ushbu loyihani amalga oshirishni ikki mamlakat hukumatlari tomonidan qo‘llab-quvvatlanishi tomonlarning mushtarak maqsadi – barqaror iqtisodiy o‘sish uchun shart-sharoit yaratish, ikki davlat eksport-import bozorini diversifikasiya qilish, shuningdek, O‘zbekiston va Rossiya tadbirkorlari hamda ishlab chiqaruvchilari uchun biznes imkoniyatlarini kengaytirishdan iborat.
Ivanovo viloyati Savdo-sanoat palatasi rahbari Leonid Ivanov o‘z chiqishida Rossiya bozori O‘zbekistondan oziq-ovqat mahsulotlari, to‘qimachilik, hunarmandchilik va kulolchilik buyumlarini import qilishdan doimo manfaatdor ekanini bildirdi. Shuningdek, Ivanovo viloyatida mamlakatimiz Savdo uyining ochilishi O‘zbekiston va Rossiya o‘rtasidagi ikki tomonlama hamkorlik rivojida yangi bosqich bo‘lishi qayd etildi.
