Qamoqda jazosini o‘tayotgan farg‘onalik "amaldor"ning yirik jinoyati fosh bo‘ldi
Oltiariqlik Rahmonberdi Tojiboyev (ism-shariflar o‘zgartirilgan) qora qilmishlari bilan o‘ziga xos «rekord» o‘rnatgan. U dastlab bundan 27 yil muqaddam qotillikka qo‘l urgan bo‘lsa, o‘tgan davr mobaynida 5 marotaba turli ko‘rinishdagi firibgarlikni sodir etgani uchun o‘ta xavfli residivist deb topilgan.
Jinoyat ishlari bo‘yicha Kogon shahar sudining 2018 yil 21 sentyabrdagi ajrimi bilan o‘talmay qolgan jazosini qattiq tartibli koloniyalarda o‘tayotgan Rahmonberdi Tojiboyevning 2013 yilda sodir etgan yana bir firibgarligi fosh qilindi.
Ma’lum bo‘lishicha, Beshariq tumanidagi «Bek karate» klubi hamda sabzavotchilikka ixtisoslashgan «Ashurmatov Bekmirzo orzusi» fermer xo‘jaligi rahbari Davron Ashurmatov 2012 yilda O‘rta Chirchiq tumani Bolalar va o‘smirlar sport maktabi direktori Doniyor Sultonov bilan tanishib, keyinchalik karate sportini rivojlantirish borasida hamkorlik qila boshlaydi. Davron Ashurmatov bir gal To‘ytepaga kelganida Doniyor Sultonov nufuzli idoraning yuqori lavozimida ishlaydigan Bahodir Nurmuhammedov degan kishi bilan tanishtirib qo‘yadi. Po‘rim kiyingan katta yoshdagi «amaldor» Davron Ashurmatovga telefon raqamini berib, har qanday muammoni hal qilishga qurbi yetishini bildiradi. Ustiga ustak, mehmonga Qur’oni Karimning audio nusxasi yozilgan ruchka ham sovg‘a qiladi.
Oradan ko‘p vaqt o‘tmay «amaldor» Farg‘onaga borib, Davron Ashurmatovning quyuq mehmoni bo‘ladi. Qaytar chog‘i unga poytaxtdagi dehqon bozoridan birining raisligini olib berishni va’da qiladi.
Davron Ashurmatov bu gapni eshitgach «ulug‘» inson bilan tanishib qolganiga amin bo‘ladi. Shu bois 2013 yilning fevral oyida «dasti uzun amaldor» o‘n ming AQSh dollari miqdorida qarz so‘raganda sira ikkilanmay beradi. O‘z navbatida, «amaldor» ham qarzni aytgan muddatida qaytaradi. Bu esa, Davron Tojiboyevning unga nisbatan bo‘lgan ishonchini yanada mustahkamlaydi.
Oradan 9 oy o‘tgach, soxta amaldor avvaldan rejalashtirgan ishiga qo‘l uradi. U Davron Ashurmatovga xorijdan zotdor qoramollar olib kelayotgani, agar kerak bo‘lsa, yordam berishga tayyorligini ma’lum qiladi.
Uzoqni ko‘zlagan reja ish beradi. D. Ashurmatov xorijdan olib kelinadigan 200 bosh qoramol uchun bir milliard sakkiz yuz ming so‘mni soxta amaldorning qo‘liga tutqazadi. Buning uchun u Yakkatut qishlog‘ida joylashgan hovlisini sotgani yetmaganidek, qarindosh-urug‘ va do‘stlaridan katta miqdorda qarz oladi. Afsuski, D. Ashurmatov aldangani, yuqori lavozimdagi «amaldor» ashaddiy jinoyatchi Rahmonberdi Tojiboyev ekanini juda kech anglab yetadi.
Bu paytda R. Tojiboyev jazoni ijro etish muassasasida boshqa jinoyatlari uchun tayinlangan ozodlikdan mahrum qilish jazosini o‘tayotgan edi.
Binobarin, D. Ashurmatovning murojaati asosida aybdorga oltinchi marotaba jinoyat ishi qo‘zg‘atildi. Jinoyat ishlari bo‘yicha Beshariq tumani sudida bo‘lib o‘tgan sud majlisiga sudlanuvchi jazoni ijro etish muassasasidan olib kelindi.
Sud Rahmonberdi Tojiboyevga ilgari tayinlangan jazoni qisman qo‘shish yo‘li bilan uzil-kesil 6 yilu 2 oy muddatga ozodlikdan mahrum qilish va 11 938 500 so‘m jarima jazosini tayinladi. Bundan tashqari jazoni maxsus tartibli koloniyalarda o‘tashi belgilandi.
Xulosa o‘rnida bir mulohazani bildirishni joiz topdik. Gap shundaki, Rahmonberdi Tojiboyev yaqin orada 70 yoshga to‘ladi. Ammo u shu tabarruk yoshni oilasi va nabiralari qurshovida emas, temir panjaralar ortida qarshi oladi. Bu esa, uning tavbasiga tayanmaganini ko‘rsatishi barobarida naqadar ayanchli ahvolda ekanining isbotidir.
Furqatjon SOBIROV,
jinoyat ishlari bo‘yicha
Beshariq tumani sudi raisi