Noqonuniy diniy ta’lim hamda qonunga xilof diniy adabiyotlar chop etganlar qo‘lga olindi

Toshkent va Farg‘ona shaharlarida huquqni muhofaza qilish organlari tomonidan o‘tkazilgan tezkor tadbirlar davomida noqonuniy diniy ta’lim berish va qonunga xilof ravishda diniy adabiyotlar tayyorlash holatlari aniqlangan.

DXX xabar berishicha, Toshkent shahrining Olmazor tumanida 1993 yilda tug‘ilgan shaxs uy sharoitida 15 nafar yoshga noqonuniy diniy ta’lim berib, har biridan 150 AQSh dollaridan olgani ma’lum bo‘lgan. O‘quvchilar orasida 11 nafar voyaga yetmagan va maktabga uch yildan beri bormay kelayotgan o‘quvchi ham borligi aniqlangan.

Xuddi shu mahalladagi yana bir uyda 1977 yilda tug‘ilgan shaxs 10 nafar voyaga yetmagan bolaga har biri uchun 100 dollar va oziq-ovqat mahsulotlari evaziga noqonuniy ta’lim bergan. U bolalarni yashirish uchun maxsus qo‘lbola yerto‘la qurdirgan.

Tadbirlar davomida ular maxsus gologrammasi bo‘lmagan, norasmiy shaklda chop etilgan diniy adabiyot va qo‘lyozmalardan foydalangani aniqlandi. Mahalla fuqarolar yig‘inida sayyor sud o‘tkazilib, har ikki shaxs MJtKning 241-moddasi asosida javobgarlikka tortildi.

Farg‘ona viloyatidagi tezkor tadbirlar davomida Buvayda tumanida 1991 yilda tug‘ilgan fuqaro uyida va ovqatlanish muassasasida qonunga xilof ravishda diniy kitoblar chop etish bilan shug‘ullangani ma’lum bo‘ldi. U kitoblarni Toshkent, Samarqand va boshqa viloyatlardagi do‘konlarga tarqatib kelgan. Tintuvda 1210 dona tayyor kitob, 2000 dona yarim tayyor bosma mahsulot va 6 ta chop etish dastgohlari ashyoviy dalil sifatida olindi.

Ma’lum bo‘lishicha, u 2024 yilda ham shu turdagi qonunbuzarlik uchun jarimaga tortilgan bo‘lsa-da, noqonuniy faoliyatini davom ettirgan. Hozirda unga nisbatan jinoyat ishi qo‘zg‘atilib, tergov ishlari olib borilmoqda.