Evroittifoq 1 iyulgacha tashqi chegaralarni ochmoqchi emas
Evropa ittifoqi uchinchi davlatlar fuqarolarining ittifoq hududiga kirishlariga qo‘yilgan cheklovni 1 iyulgacha uzaytirishga qaror qildi. Bu haqda Bloomberg xabar bermoqda.
Ichki ishlar bo‘yicha yevrokomissar Ilva Yoxanssonning ma’lum qilishicha, cheklovlarni uzaytirishni aksariyat mamlakatlar hukumatlari qo‘llab-quvvatlagan.
«Bugun deyarli barcha a’zo mamlakatlar ushbu davrning uzaytirilishini ma’qullashini bildirdi. Demak, ichki chegaralardagi nazorat iyun oxirida bekor qilinadi», — dedi Yoxansson.
Agentlikning eslatishicha, cheklovlar mart o‘rtalarida kiritilgan va ikki marta uzaytirilgan bo‘lib, 15 iyunda nihoyasiga yetadi. Yevropa komissiyasi YEIning tashqi chegaralari faqat ichki chegaralar ochilganidan keyingina ochilishini talab qilmoqda.
