Buyuk Britaniya o‘zbekistonlik tibbiyot sohasi vakillari uchun 10 mingdan ziyod ish o‘rni taklif etmoqda

Mamlakatimiz migrasiya siyosatida sezilarli o‘zgarishlar kuzatilmoqda. Hozir “mehnat muhojiri” tushunchasiga nisbatan munosabat tubdan o‘zgargan. Bugun xalqaro mehnat bozoriga mamlakatimiz nafaqat, xalq tili bilan aytganda, “qora ishchi”, balki oliy ma’lumotli mutaxassislar taklif eta boshladi. Tabiiyki, tajribali o‘zbek mutaxassislariga talab borgan sari ortmoqda.

Darvoqe, migrasiya geografiyasini kengaytirish, xususan, ayni yo‘nalishda Yevropaning rivojlangan davlatlari bilan hamkorlik qilish davlatimiz rahbari tomonidan qo‘yilgan eng muhim vazifalardan biridir.

Shu ma’noda, so‘nggi yillarda Buyuk Britaniya bilan migrasiya sohasidagi aloqa rivojlanib borayotgani e’tiborli.

Ma’lumot o‘rnida aytish joiz, joriy yil 1-chorakda jami 23 535 yurtdoshimiz vaqtincha ishlash uchun xorijga jo‘natildi. Ulardan 795 nafari Buyuk Britaniyada. Avval yurtdoshlarimizni, asosan, qishloq xo‘jaligida ishlash uchun qabul qilgan Birlashgan Qirollik endi tibbiyot sohasi vakillari uchun ham yangi ish o‘rinlari taklif etmoqda.

Toshkent shahridagi “Ishga marhamat” mono markazida Buyuk Britaniyaning “NEU Professionals” rekruting agentligi tomonidan ayni soha vakillari uchun yangi imkoniyatlar taklif etildi.

Shu munosabat bilan bo‘lib o‘tgan matbuot anjumanida ish beruvchi talabi, ushbu yurtda ishlash tartibi batafsil tushuntirildi.

2013 yil chet ellik tibbiyot mutaxassislarini Buyuk Britaniyaning Oksford universiteti shifoxonasi va boshqa tibbiyot muassasalari uchun yollashga ko‘maklashish maqsadida tashkil etilgan “NEU Professionals” rekruting kompaniyasi endilikda xorijdan Angliya va Uelsga kadr yetkazib berish bilan ham shug‘ullanmoqda.

Angliya delegasiyasi vakillari Buyuk Britaniyada tibbiy xodimlarga talab juda yuqori ekanini ta’kidlab,o‘zbekistonlik 10 mingdan ortiq mutaxassisni chet tiliga o‘qitish orqali ishga qabul qilish, 3 000 dollar miqdorida oylik maosh to‘lashga tayyorligini bildirdilar.

– Afsuski, Buyuk Britaniyadagi hamshiralarning aksariyati 50 yoshdan oshgan, – deydi kompaniya rahbari Edita Ozbek. – Shu bois muayyan tajribaga ega yosh hamshiralarga talab kuchli. Ishga jalb qilinayotganlarga qulay sharoit yaratish, yaxshi maosh berish barobarida, ularning xavfsizligi ta’minlanadi, huquqi, manfaati himoya qilinadi. O‘n yildan buyon ko‘p davlatlar bilan hamkorlik qilyapmiz. O‘zbekiston bilan ham yaxshi aloqa o‘rnatib, almashinuv dasturlarini yo‘lga qo‘ymoqchimiz. Bu hamkorlik har ikki davlat iqtisodiyoti va soha rivoji, xususan mutaxassislar tajribasini oshirish uchun muhim.

Angliya tomoni o‘zbekistonlik tibbiyot sohasi vakillari, jumladan hamshiralar o‘rta tibbiy xodim sifatida faoliyat yuritish bilan cheklanib qolmasligi, balki qobiliyati, intilishi, tajribasi va til bilishidan kelib chiqib, vazifasi nuqtai nazaridan o‘sish imkoniga ega bo‘lishini ta’kidladi.

– Loyiha haqida eshitib, qiziqib qoldim, – deydi Navro‘zaYAminova. – Tibbiyot kollejini tamomlab, bir muddat patronaj hamshira bo‘lib ishladim. Hozirgi ish joyim stomatologiya klinikasi. Ingliz tilini o‘rganib, Buyuk Britaniyaga bormoqchiman. Xorijda faoliyat ko‘rsatib nafaqat oilamga moddiy jihatdan ko‘maklashish, balki tajriba almashish, kasbiy rivojlanish orqali xalqaro talabga javob beradigan mutaxassis bo‘lib qaytmoqchiman.

Koventri universitetining Toshkentdagi raqamli iqtisodiyot va agrotexnologiya yo‘nalishlariga ixtisoslashgan filiali bilan hamkorlikda ish olib borayotgan mazkur kompaniya kelgusida Yangi Zelandiya, Avstraliya, Irlandiya kabi ingliz tilida so‘zlashuvchi davlatlardan ham O‘zbekistonga bo‘sh ish o‘rinlari taklif etishni yo‘lga qo‘yish niyatida.

Anjumanda ko‘tarilgan masalalar yuzasidan “yo‘l xaritasi” tuzilib, amaliy harakatga o‘tish yo‘llari belgilab olindi.