Buxoroda voyaga yetmagan qizini muntazam kaltaklab, tanasini issiq suv bilan kuydirgan onaga hukm o‘qildi

2022 yil 30 may kuni jinoyat ishlari bo‘yicha Peshku tuman sudi tomonidan sudlanuvchi Rajabova Zarina Sayodovnaga nisbatan O‘zbekiston Respublikasi JK 110-moddasi 2-qismining “a” bandi bilan hukm o‘qildi.

Ish tafsilotlari ko‘ra, Z.Rajabova 2021 yilning yanvar oyi oxirlaridan 2021 yilning may oyi oxirlariga qadar bo‘lgan davr davomida, o‘zining Peshku tuman “Xurram” MFY, “Kallasang” qishlog‘ida joylashgan yashash uyida, o‘gay qizi voyaga yetmagan Rashidova Shahzoda Rahim qizini muntazam ravishda urib, tanasini turli qismlariga qaynatilgan suv bilan kuydirish orqali muttasil ravishda qiynab, sud tibbiy ekspertiza ilmiy amaliy markazi Romitan filialining 2022 yil 31 yanvardagi 28-sonli xulosasiga ko‘ra, “sog‘ligining buzilishiga sababchi bo‘lgan yengil tan jarohati” yetkazib, voyaga yetmagan shaxsga nisbatan qiynash jinoyatini sodir etgan.

Garchand sudda sudlanuvchi Z.Rajabova aybiga qisman iqrorlik bildirib, o‘gay qizi voyaga yetmagan SH.Rashidova uning jahlini chiqarganida urgan bo‘lsa-da, uning qo‘li, oyog‘i va tanasidan boshqa joylariga qaynoq suv to‘kib qiynamaganligini, og‘ziga peshob qilmaganligini, rezina shlang bilan tanasidan urmaganligini, ikki qo‘liga matoni o‘rab eshik va derazaga bog‘lab qo‘ymaganligini bildirgan bo‘lsa-da, uning voyaga yetmagan SH.Rashidovani muttasil ravishda urib qiynaganligida ifodalangan aybi, jabrlanuvchi voyaga yetmagan SH.Rashidovaning suddagi 2021 yil yanvar oyining oxirlarida o‘gay onasi Zarina qaynab turgan issiq suvni qo‘liga quyganligi, 2021 yil fevral oyining boshlarida ikkala oyog‘iga qaynoq suv to‘kkanligi, 2021 yil 25 aprel kuni uyga kiraverish eshigi oldidagi beton zinaga sochidan ushlagan holda urganligi, rezina shlang bilan orqa tomon bel qismidan urganligi, 2021 yil may oyi boshlarida barcha ro‘mollarni bir-biriga bog‘lab, uni qo‘lini eshik va derazaga tortib ertalabgacha bog‘lab qo‘yganligi, 2021 yil may oyi o‘rtalarida oshxonaning yonidagi uyga olib kirib og‘ziga peshob qilganligi, keyin esa tashqariga olib chiqib chelakda turgan issiq suvni ustiga sepganligi haqidagi ko‘rsatuvi;

- guvoh A.Haitov, A.Xolov, G.Maqsudova va D.Jumayevning suddagi ko‘rsatuvlari;

- RSTEIAM Buxoro viloyati Romitan tuman punktining 2022 yil 30 yanvardagi voyaga yetmagan SH.Rashidovaga oid “chap boldir old yuzasidan yaradan keyingi chandig‘i sud tibbiy ekspertiza o‘tkazgunga qadar uzoq muddat o‘tganligi sababli muddatini aniqlash imkoniyati bo‘lmaganligi, ushbu yuqori haroratga ega bo‘lgan omil, ya’ni tekshiruluvchi aytgan holatda yuzaga kelgan bo‘lishi mumkinligi, og‘irlik darajasi bo‘yicha sog‘ligining buzilishiga sababchi bo‘lgan yengil tan jarohati toifasiga kirishi haqida”gi 28-sonli sud tibbiy ekspertizasi xulosasi;

- voyaga yetmagan SH.Rashidova va gumon qilinuvchi Z.Rajabova o‘rtasida o‘tkazilgan yuzlashtirishdagi ko‘rsatuvlar bilan hamda jinoyat ishida mavjud bo‘lgan boshqa dalillar yig‘indisi bilan to‘liq o‘z isbotini topgan deb hisobladi.

Sud, sudlanuvchi Z.Rajabovaga nisbatan jazo tayinlash masalasini muhokama qilib, jinoyatni sodir etish sabablari va bunga olib kelgan shart-sharoitni, jinoyat sodir etish paytidagi va sodir etilganidan keyingi xulq-atvorini, mazkur jinoyat voyaga yetmagan shaxsga nisbatan sodir etilganligini, jabrlanuvchining qonuniy vakili da’vo qilib sudlanuvchiga nisbatan ozodlikdan mahrum qilish jazosi tayinlanishini talab qilganligini inobatga olib, sodir etilgan jinoyatning xususiyati va ijtimoiy xavflilik darajasini, sodir bo‘lgan holatlar qay darajada voyaga yetmaganning hayotiga va ruhiy holatiga salbiy ta’sir qilganligini huquqiy baholab, uning qilmishini jazoga sazovor va uni jamiyatdan ajratmagan holda axloqan tuzatish mumkin emas degan to‘xtamga kelgan bo‘lsa-da, sudlanuvchi tomonidan sodir etilgan jinoyat uncha og‘ir bo‘lmagan jinoyatlar toifasiga kirishini, sudlanuvchining uncha og‘ir bo‘lmagan jinoyatni birinchi marotaba sodir etganligini, uning ayolligini va qaramog‘ida 1 (bir) yoshga to‘lmagan farzandi borligini shuningdek, JKning 50-moddasining 10-qismida qasddan uncha og‘ir bo‘lmagan jinoyat sodir etganlik uchun ozodlikdan mahrum etish tariqasidagi jazo uch yoshga to‘lmagan bolalari bor ayollarga nisbatan tayinlanmasligi qayd qilinganligini inobatga olib, unga nisbatan O‘zbekiston Respublikasi JK 110-moddasi 2-qismi “a” bandi bilan kunning kech soat 21:00dan ertalab soat 7:00gacha yashash joyidan chiqishni cheklagan holda 5 yil ozodlikni cheklash jazosi tayinlanib, jazo o‘tash davrida Rajabova Zarina Sayodovnaning zimmasiga bir qator qo‘shimcha taqiqlar (cheklashlar) yuklanib, jabrlanuvchi voyaga yetmagan SH.Rashidovaning bitgan yarasini yangilamaslik hamda sudlanuvchi bilan uchrashuvi uning ruhiy holatiga salbiy ta’sir ko‘rsatishini oldini olish maqsadida sudlanuvchining zimmasiga voyaga yetmagan SH.Rashidova va uning oila a’zolari bilan uchrashmaslik, ular bilan aloqa o‘rnatmaslik kabi majburiyat ham yuklatildi.

Zarif Sherov,

Buxoro viloyat sudining jinoyat ishlari bo‘yicha sudyasi

Farrux Ikramov,

Jinoyat ishlari bo‘yicha Peshko‘ tuman sudining raisi