“Ayollar daftari”ga kiritilgan xotin-qizlarga tadbirkorlik bilan shug‘ullanishi uchun kreditlar ajratiladi
“Xotin-qizlarni ijtimoiy qo‘llab-quvvatlash bo‘yicha qo‘shimcha chora-tadbirlar to‘g‘risida”gi Hukumat qarori (2-son, 08.01.2021 y.) qabul qilindi.
Qaror bilan Xotin-qizlar muammolarini “Ayollar daftari”ni yuritish orqali tizimli ravishda hal etish va ularni ijtimoiy qo‘llab-quvvatlash bo‘yicha vaqtinchalik tartib tasdiqlandi.
Unga ko‘ra, har bir sektor kesimida mahallabay “Ayollar daftari”ga 30 yoshdan oshgan quyidagi toifadagi xotin-qizlar kiritiladi:
— ijtimoiy himoyaga muhtoj ishsiz xotin qizlar;
— boquvchisini yo‘qotgan ehtiyojmand xotin-qizlar;
— ijtimoiy yordamga muhtoj I va II guruh nogironligi bo‘lgan xotin-qizlar;
— uy-joyini ta’mirlashga muhtoj I guruh nogironligi bo‘lgan xotin-qizlar;
— noturar joylarda istiqomat qilayotgan, o‘zining yoki birgalikda yashovchi oila a’zolarining nomida turar joyi mavjud bo‘lmagan xotin-qizlar;
— qaramog‘ida bir yoki undan ortiq I va II guruh nogironligi bo‘lgan bolalari mavjud yolg‘iz ayollar;
— tibbiy himoyaga muhtoj ehtiyojmand xotin-qizlar (o‘zi va birgalikda yashovchi oila a’zolari og‘ir ijtimoiy vaziyatda bo‘lgan, surunkali yoki og‘ir nogironlikka olib keluvchi kasallikka chalingan, nogironlik guruhi belgilanmagan, yetarli damromad manbaiga ega bo‘lmaganlar);
— huquqiy yordam olishga muhtoj xotin-qizlar;
— psixologik maslahatga muhtoj xotin-qizlar (tazyiq va zo‘ravonlikdan jabrlangan, ijtimoiy muammolari mavjud xotin-qizlar).
“Ayollar daftari” quyidagi tartibda yuritiladi:
— Xotin-qizlarning muammolari, ehtiyojlari va qiziqishlari har yarim yil birinchi oyining dastlabki 15 kunida uyma-uy yurib o‘rganiladi.
— Xotin-qizlarning muammolari anketa-so‘rovnoma orqali aniqlanib, aniqlangan muammolar 3 kundan oshmagan muddatda xotin-qizlarning shaxsiy individual anketalariga kiritiladi.
Shunga ko‘ra, 1 kun muddatda individual anketalar ko‘rib chiqiladi.
Shundan keyin 3 kundan oshmagan muddatda anketa ma’lumotlari idora va tashkilotlarning ma’lumotlari bilan solishtiriladi hamda ayollarning ijtimoiy himoyaga muhtojlik darajasi (toifasi) aniqlanadi.
“Ayollar daftari”ga kiritiladigan xotin-qizlarning ro‘yxatlari hamda ularning muammolarini bartaraf etishga qaratilgan “Yo‘l xaritasi” loyihasi 7 kundan oshmagan muddatda Xalq deputatlari tuman (shahar) kengashiga kiritiladi.
Tasdiqlangan ro‘yxatlar 3 kundan oshmagan muddatda Mahalla yagona axborot tizimi dasturiga kiritilib, shu asosda vaqtinchalik tartibda belgilangan xizmatlar ko‘rsatiladi.
Shuningdek, “Ayollar daftari”ga kiritilgan va tadbirkorlik bilan shug‘ullanish istagida bo‘lgan xotin-qizlarga BHMning 150 baravarigacha (33 mln 450 ming so‘m) miqdorda kreditlar ajratiladi.
Kreditlarning foiz stavkasi Markaziy bankning asosiy stavkasida belgilanadi.
➡️ Kreditlar 6 oygacha imtiyozli davr bilan 3 yildan ko‘p bo‘lmagan muddatda Xalq bankining tuman (shahar) filiallari tomonidan “Ayollar daftari”ga kiritilgan xotin-qizlarning familiya, ismi, otasining ismi bo‘yicha alfavit tartibida shakllantirilgan qat’iy navbat asosida ajratiladi.
☑️ Shuningdek, Xalq deputatlari tuman (shahar) kengashi tomonidan tasdiqlangan ro‘yxatlar asosida “Ayollar daftari”ga kiritilgan xotin-qizlarga BHMning ikki baravaridan to‘rt baravarigacha (446 ming so‘mdan 892 ming so‘mgacha) miqdorda bir martalik moddiy yordam berilishi mumkin.
Bir martalik yordam olgan xotin-qizlar “Ayollar daftari”dan chiqarilmagan yoki bir yil ichida qayta kiritilgan hollarda bir martalik moddiy yordam bir kalendar yili davomida bir marotaba beriladi.
Bundan tashqari, sektorlar rahbarlari hamda tuman (shahar) mahalla va oilani qo‘llab-quvvatlash bo‘limi boshlig‘ining xulosasi asosida “Ayollar daftari”ga kiritilgan xotin-qizlarga turar joy ijara kompensasiyasi to‘lab beriladi.
Turar joy ijarasi to‘g‘risidagi shartnoma 2021 yil 31 dekabrga qadar bo‘lgan muddatga tuzilib, to‘lovlar ijaraga beruvchiga to‘g‘ridan-to‘g‘ri to‘lanadi.
“Ayollar daftari”ga ikki va undan ortiq ortiq masalalarini hal etish uchun kiritilgan xotin-qizlarning barcha masalalari to‘liq hal etilgach, daftardan chiqariladi.
Daftardan chiqarilgan xotin-qizlar tuman (shahar) mahalla va oilani qo‘llab-quvvatlash bo‘limlari tomonidan 5 kun ichida bu haqda yozma ravishda xabardor qilinadi.
