AQSh yana G‘azoda o‘t ochishni to‘xtatishni talab qiluvchi rezolyusiya loyihasiga veto qo‘ydi

AQSh BMT Xavfsizlik Kengashining doimiy bo‘lmagan o‘n a’zosi tomonidan tayyorlangan va G‘azoda zudlik bilan va so‘zsiz o‘t ochishni to‘xtatish talab qilingan Falastin-Isroil mojarosi bo‘yicha rezolyusiya loyihasiga veto qo‘ydi, deya xabar berdi «TASS».

Hujjat uchun Xavfsizlik kengashining 15 a’zosidan 14 nafari ovoz berdi. O‘tgan oktyabr oyida Yaqin Sharqdagi mojaro avj olganidan beri Qo‘shma Shtatlar G‘azo sektorida o‘t ochishni to‘xtatish rezolyusiyasiga beshinchi marta to‘sqinlik qilmoqda.

Rezolyusiya loyihasi Xavfsizlik Kengashining 10 nafar doimiy bo‘lmagan a’zosi tomonidan tayyorlangan va to‘qqiz banddan iborat bo‘lib, birinchisi "barcha tomonlar tomonidan zudlik bilan, so‘zsiz va doimiy ravishda o‘t ochishni to‘xtatish talabini" o‘z ichiga oladi. Hujjatda anklavda saqlanayotgan barcha garovga olinganlarni ozod qilish, barcha tomonlar tomonidan xalqaro qonunlarga rioya qilish va G‘azoning tinch aholisiga gumanitar yordam olish imkoniyatini ta’minlash talablari bayon etilgan. Rezolyusiya loyihasida, shuningdek, hujjat qabul qilingan taqdirda, BMT bosh kotibi uch hafta ichida Xavfsizlik Kengashiga rezolyusiya ijrosi yuzasidan yozma hisobot taqdim etishi kerak bo‘lgan band bor.

Sektor Sog‘liqni saqlash vazirligi ma’lumotlariga ko‘ra, o‘tgan yilning oktyabr oyida boshlangan harbiy operasiyadan buyon G‘azoda jami 44 ming falastinlik halok bo‘lgan, 104 ming nafari yaralangan.