Венгриялик машҳур тиш шифокори Ўзбекистон томони билан ҳамкорликка тайёр
Ўзбекистоннинг Венгриядаги элчиси Ойбек Шахавдинов Урбан регенерация институти директори, профессор Иштван Урбан билан учрашув ўтказди, деб хабар қилмоқда "Дунё" АА мухбири.
Ғарб стоматологларининг фикрига кўра, Иштван Урбан имплантология, тиш суякларини тиклаш ва имплантлар атрофидаги юмшоқ тўқималарни реконструктив жарроҳлик йўли билан даволаш бўйича дунёдаги энг таниқли ва энг кучли мутахассис. У бутун дунёда тан олинган суяк пластиклари билан ишлаш техникасини яратган.
Профессор Ўзбекистон томони билан халқаро талаблар ва стандартлар даражасида стоматология соҳасида юқори малакали тиббиёт кадрларини тайёрлаш, имплантологияда суяк регенерацияси йўналишида илғор билим ва амалий кўникмаларни жорий этиш бўйича ҳамкорликка тайёрлигини билдирди.
- Мен тиш суякларни олиб ташлаш ўрнига уларни қайта тиклашни ўргатаман, - деди Иштван Урбан.
Эслатиб ўтамиз, Урбан регенерация институти кенг қамровли имплантологик даволанишга ихтисослашган ва эстетик, косметик стоматология, пластик жарроҳлик, асосан тиш суяк тўқимасини тиклаш ва имплантологияга эътибор қаратадиган йирик клиникадир.
