Венесуэлада президентлик сайловидан кейинги намойишларда 2 мингга яқин одам ҳибсга олинди
Бу ҳақда мамлакатнинг амалдаги президенти Николас Мадуро маълум қилди.
"Бизда 2000 маҳбус бор ва биз уларни қаттиқ тартибли Токорон ва Токюито қамоқхоналарига жўнатамиз", — дея таъкидлади Мадуро Каракасда ўз тарафдорлари иштирокидаги митингда.
Унинг фикрича, намойишчилар Венесуэланинг қонуний ҳукуматига қарши жиноий ҳужумларда ва тартибсизликларда қатнашган, мухолиф кучлардан президентликка номзод Эдмундо Гонсалес эса "қочиб кетган" ва "ўзини президент" деб эълон қилишдан қўрққан.
Венесуэлада Марказий сайлов комиссияси президентлик сайловида Мадуронинг 51,2% овоз билан ғалаба қозонганини эълон қилиши натижасида норозилик намойишлари давом этмоқда.
Мухолифатнинг маълум қилишича, мустақил экзит-полл натижаларига кўра, сайловчиларнинг 31 фоизи Николас Мадурога, қарийб 65 фоизи эса мухолифат номзоди Эдмундо Гонсалесга овоз берган.
