Украинада фуқароликни бериш соддалаштирилди
![Украинада фуқароликни бериш соддалаштирилди Украинада фуқароликни бериш соддалаштирилди](/photos/news/707muYH91miPW1x.jpeg)
Украина Олий радаси 20 август куни Украина қуролли кучлари сафида жанг қилаётган хорижлик кўнгиллиларга ушбу давлат фуқаролигини олишни осонлаштирувчи қонун лойиҳасини қабул қилди. Ҳужжат Украина президенти Володимир Зеленскийга имзолаш учун юборилган.
Украина фуқаролигини, янги нормаларга кўра, армия, Давлат махсус транспорт хизмати ёки Миллий гвардия таркибида Россия томонидан Украинада бошланган тажовузкор урушда қатнашган хорижий мамлакатлар фуқаролари олишлари мумкин. Мамлакат шарқида 2014 йилда бошланган жанговар ҳаракатлар иштирокчилари ҳам бундан фойдалана олади.
Кўнгиллилар билан биргаликда уларнинг оила аъзолари, шунингдек, Россиянинг Украинага қарши урушида ҳалок бўлган хорижликлар турмуш ўртоқлари паспорт олиш учун ариза топширишлари мумкин. Ўз ватанларида сиёсий таъқибдан жабр кўрган одамлар ҳам Украина фуқароси бўла олади.
Янги нормалар Россия ва Беларус фуқароларига ҳам тегишли. Украина фуқаролигини олиш учун аризачи ўз мамлакати паспортидан воз кечиши керак бўлади. Бундан ташқари, аризани топшириш вақтида у Украинада камида икки йил (хорижий кўнгиллилар учун) ёки беш йил (сиёсий муҳожирлар учун) қонуний равишда яшаши лозим.