Туркия Россиядан яна С-400 зенит-ракета мажмуаси сотиб олмоқчи
Туркия президенти Ражаб Тоййиб Эрдоған Россиядан С-400 зенит-ракета мажмуасининг иккинчи партиясини сотиб олиш режалаштирилганини маълум қилди. «Келгусида қайси давлатдан қандан тизимни сотиб олишимизга ҳеч ким аралаша олмайди», – деди у Американинг CBS телеканалига берган интервьюсида.
Анқаранинг ушбу қарори Туркия ва АҚШ ўртасидани кескинликни кучайтириши ҳамда Вашингтоннинг Анқарага қарши янги сакциялар жорий этишига сабаб бўлиши мумкин.
АҚШнинг фикрича, С-400 тизими F-35 қирувчи самолётлари ва НАТОнинг бошқа мудофаа тизимларига хавф солади. Туркия эса НАТО аъзоларининг бирортасидан мақбул вақтда ҳаво мудофаа тизимини сотиб ололмаётганини айтмоқда.
Анқара Россиядан С-400 тизимини сотиб олгани учун АҚШ Туркиянинг Мудофаа саноати бошқармаси раҳбарларига қарши санкциялар жорий қилган.
Эслатиб ўтамиз, Туркия ва Россия 2017 йилда С-400 бўйича 2,5 миллиард долларлик шартнома имзолаган эди. Тизимни Туркияга етказиб бериш 2019 йилда бошланди.