Трамп Facebook ва Instagram саҳифалари тикландими?
Facebook компанияси вакили Энди Стоун АҚШнинг собиқ президенти Дональд Трампнинг Facebook ва Instagram саҳифалари тиклангани ҳақидаги хабарни рад этди.
“Президент Трампнинг бизнинг платформамиздаги статусида ўзгариш юз бермади. Унинг кириши номаълум муддатга тўхтатилган”, – деб ёзди Стоун ўз Твиттерида.
Олдинроқ қатор ОАВ Трампнинг Facebook ва Instagram аккаунтлари тиклангани ҳақида ёзган эди. Бунинг устига унинг вакили Жейсон Миллер NBC телеканалига Трамп ўз фикрларини ёзиб борадиган блоги бир умрга ёпилганини маълум қилди. Унинг айтишича, бир ойдан кам пайт юритилган “Дональд Трамп иш столидан” (“From the Desk of Donald J. Trump”) номли блог собиқ президентнинг сайтидан ўчирилган ва бошқа тикланмайди.
Facebook ва Twitter Трампнинг аккаунтларини 6 январь куни унинг тарафдорлари Капитолий биносига ҳужум қилганида блоклаб қўйган эди.
