Сирдарёдаги техноген офатдан кейин тиклаш ишларига жалб қилинган “Кўприкқурилиш” трести ишчиларига маош берилмаганми?
"Сардоба" сув омборидаги техноген фалокат оқибатларини бартараф этишда ҳамда Гулистонда кислород баллони портлаган спорт мажмуасини тиклаш ишларида иштирок этаётган "Ўзбекистон темир йўллари" АЖ таркибидаги корхона ишчилари маошсиз ишламоқда, деган хабар ижтимоий тармоқлар ва электрон ОАВларда тарқалди. Мазкур хабарга "Ўзбекистон темир йўллари" АЖ расмий баёнот берди.
Маълум қилинишича, Сирдарё вилоятидаги тиклаш-қурилиш ишларига "Ўзбекистон темир йўллари" АЖ ва унинг таркибига кирувчи “Кўприкқурилиш” трести ишчилари жалб қилинган.
Ўрганиш жараёнида ҳақиқатдан ҳам тиклаш ишларига жалб қилинган “Кўприкқурилиш” трести отрядлари ишчиларининг ойлик маошлари ўз вақтида берилмагани аниқланган. Бунинг асосий сабаблари ҳозирги тиклаш ишларини бажариш даврида асосий эътибор аввал шартнома, молиялаштириш ва бошқа қоғозбозликларни кутиб ўтирмасдан, юз берган фалокат оқибатида зарар кўрган иншоотларни тезлик билан тиклаш мақсадида жуда катта куч ва техникалар жалб этилиб, қурилиш-монтаж ишлари амалга ошириш бошлаб юборилгани, эндиликда эса барча ҳужжатлар расмийлаштирилаётгани билдирилган.
"Ушбу ҳолатни тўлиқ бартараф этиш ва бу каби иш ҳақи чўзилиши такрорланмаслиги учун бюджет маблағларини кутиб ўтирмасдан тижорат банклари кредитларини жалб қилиш бўйича музокаралар бошлаб юборилди. Бир ҳафта муддатида “Кўприкқурилиш” трести отрядларининг барча иш ҳақидаги қарздорликлари тўлиқ бартараф этилиши белгилаб олинди", дейилади баёнотда.
