Қамоқдаги Алвесдан 5 миллион доллар талаб қилишмоқда

"Пумас" Бразилия терма жамоасининг собиқ ҳимоячиси Дани Алвесдан шартномани бузгани учун 5 миллион доллар талаб қилмоқда, деб хабар беради UOL.

Манбанинг хабарига кўра, Мексика клуби раҳбарияти Алвесга хат йўллаган, унда у шартноманинг можароларда иштирок этиш ва жиноят содир этишга йўл қўйилмаслиги ҳақидаги бандига мувофиқ товон тўлашни талаб қилган. Бундан ташқари, "Пумас" барча мумкин бўлган қонуний чораларни кўриш, жумладан ФИФА билан боғланиш ҳуқуқини ўзида сақлаб қолади.

Алвес 2022 йил 30 декабр куни Барселонадаги тунги клубда учрашган қизни зўрлаганликда айбланмоқда. 39 ёшли футболчи 20 январь куни қўлга олиниб, ҳибсга олинган. Агар Алвес айбдор деб топилса, у 4 йилдан 12 йилгача қамоқ жазосига ҳукм қилиниши мумкин.

Аввалроқ Бразилия терма жамоаси собиқ ҳимоячисининг рафиқаси ажрашиш учун ариза беришга қарор қилгани маълум бўлганди.

21 январь куни "Пумас" Алвес билан шартномани бекор қилганини эълон қилди. Футболчи жамоада 2022 йилнинг июнидан буён ўйнаб келаётган эди.