ОАВ: Украинада кунига 200–250 нафар россиялик аскар ҳалок бўлмоқда
Сўнгги ойларда Украинада Россия армиясининг кунига 250 нафаргача аскари ўлдирилмоқда, уруш бошланганидан буён эса ҳалок бўлган аскарлар сони 120 мингдан ошган. «Медуза» нашри мерос ишлари реестри ва ўз ҳисоб-китобларига асосланиб ана шундай рақам келтирмоқда.
Нашр тадқиқотчилари янги ўлдирилганларнинг ёшига қараб тақсимланиши ва уларнинг мерос реестрига киритилишини ҳисобга олувчи математик модел яратишди. Бундай ҳисоб-китобларга кўра, 2024 йилнинг бошидан буён Россия армиясининг тиклаб бўлмас йўқотишлари 39 минг кишига ошган. Бу ўтган йилнинг сўнгги чорагидаги ҳалок бўлган йўқотишларнинг ўртача суръатидан қарийб икки баробардан ҳам кўпроқ. Ўшанда «Медуза» кунлик йўқотишларни тахминан 120 кишига баҳолаган эди, бугунги кунга келиб Украинада кунига 200–250 россиялик аскар ҳалок бўлмоқда.
Тадқиқотчиларнинг сўзларига кўра, йўқотишлар миқдорининг ошиши шу йилнинг қишидан ва Авдийивка шаҳрининг штурм қилинишидан бошланган ва бутун фронт чизиғи бўйлаб ҳужумлар чоғида ва Ҳаркив областига ҳужум чоғида давом этган. Ҳозирги босқин Бахмут ва Соледар учун жанглардаги йўқотишлардан ошиб кетган. Ўшанда Россия қўшинлари тахминан 21 минг аскаридан айрилган.
АҚШ, Буюк Британия ва Ғарбнинг бошқа давлатлари разведкасига кўра, Россия армияси урушга ёллаган аскарларининг барчасидан жанг майдонида жудо бўлмоқда, ҳаттоки айрим жойларда бундан ҳам кўпроқ. Камида вазият май ойида шундай бўлган, ўшанда Россия Харкив областига бостириб кирган эди. Британия разведкаси май ойини бутун уруш давомидаги энг қонли ой деб атаган ва кунлик йўқотишлар ўртача 1200 киши бўлганини иддао қилади. Агар тахмин тўғри бўлса, май ойининг ўзида Россия армияси 31–37 минг аскаридан айрилган.
Бу ҳолда америкалик мулозимлар Россия ойига 25–30 минг аскар билан армия сафини тўлдиришда давом этаётганини айтишмоқда. Бу қўмондонларга аскарларнинг сонини ўйламасдан, уларни ўлимвор «тўпеми штурмлари»га ташлашда давом этиш имконини беради.
Июн ойи бошларида Россия президенти В.Путин икки ярим йиллик уруш чоғида Россия армиясининг йўқотишларини 130 минг кишига баҳолаган эди. Унинг сўзларига кўра, Россия ва Украинанинг тиклаб бўлмас йўқотишлари нисбати бирга беш нисбатда. Шундай қилиб, Россия армиясининг расмий йўқотишлари сони ойига 10 минг аскарга тенг. 27 ойлик урушда бу 270 минг рақамини беради ва уларнинг 135 нафари ҳалок бўлганлар.
Шунга яқин рақамни Франциянинг Европа ва ташқи ишлар вазири Стефан Сежурне келтирган эди. Унинг баҳолашларига кўра, россия армияси шу чоққача 150 минг аскаридан айрилган.
Британия Мудофаа вазирлишининг маълумотларига кўра, 2024 йилнинг апрели охиригача Россия армиясининг 450 минг аскари Украинада ё оғир ярадор бўлган ёки ҳалок бўлган. Бу рақам ичига Россия қамоқхоналаридан ўн минглаб маҳбусларни ёллаб, «тўпеми штурмлар»га ташлаган «Вагнер» сингари хусусий ҳарбий компанияларнинг йўқотишлари кирмайди. Америка разведкаси ўтган йилнинг августида Россия йўқотишларини 360 киши, жумладан 120 мингта ҳалок бўлган аскарларга баҳолаган эди.
«Медиазона» ва BBC Россиянинг 50 мингдан ортиқроқ аскарининг ўлимини бирма-бир тасдиқлаб ҳужжатлаштирган. Уларнинг маълумотларига кўра, ўлганларнинг 43 фоизи Украинага кенг кўламли босқин бошлангунча армияга алоқадор инсонлар бўлмаган. Тасдиқланган йўқотишларнинг 18 фоизини маҳбуслар, 13 фоизини кўнгиллилар, 12 фоизини сафарбар қилинганлар ташкил этади. Ҳалок бўлган яна 28 фоиз аскарларнинг қай бир гуруҳ ёки қўшинларга алоқадорлигини аниқлашнинг имкони бўлмаган.
