Мақсуда Ворисова Мирзиёевни ғалаба билан табриклади

Халқ демократик партиясидан президентликка номзод бўлган Мақсуда Ворисова Шавкат Мирзиёевни сайловдаги ғалаба билан табриклади. Бу ҳақда «Газета.uz» мухбири хабар бермоқда.

«Марказий сайлов комиссияси Ўзбекистон президентлигига бўлиб ўтган сайлов натижалари бўйича ЎзЛиДеПдан кўрсатилган номзод Шавкат Мирзиёев жуда катта фарқ билан ғолиб чиққанини эълон қилди. ХДПдан кўрсатилган номзод 6,6 фоиз билан 2-ўринни эгаллади», — деди у партия ташкил этган брифингда.

У «сайлов натижаларини тўла-тўкис тан олишини» айтди. Мақсуда Ворисова «халқнинг ушбу танловини ҳурмат қилишини ва қадрлашини» таъкидлади.

«Шавкат Мирзиёев томонидан ишлаб чиқилиб, эълон қилинган "Янги Ўзбекистон Стратегияси" халқимизнинг қалбидан чуқур ўрин эгаллади», — дея қўшимча қилди Мақсуда Ворисова.