Лавров Миср ташқи ишлар вазири билан Ғазода ўт очишни тўхтатиш масаласини муҳокама қилди
Россия ташқи ишлар вазири Сергей Лавров ва Миср ташқи ишлар вазири Бадр Абдел Ати Ғазо секторида ўт очишни тўхтатиш шартларини муҳокама қилди. Бу ҳақда ТАСС хабар бермоқда .
Вазирлар телефон орқали мулоқот чоғида минтақадаги кескинликни юмшатиш масаласини муҳокама қилдилар. «Суҳбат чоғида Фаластин-Исроил можароси зонасида тезроқ ўт очишни тўхтатиш ва минтақадаги вазиятни умумий тарзда юмшатиш зарурлигига урғу берилган ҳолда, Яқин Шарқда юзага келаётган вазият юзасидан фикр алмашилди. Шу билан бирга, Москва ва Қоҳиранинг Яқин Шарқ муаммоларининг бутун мажмуаси бўйича ҳаракатларни мувофиқлаштиришга доимий эътибор қаратилиши тасдиқланди», — дейилади ТИВ хабарида.
Суҳбат Миср томонининг ташаббуси билан бўлиб ўтди. Вазирлар икки томонлама ва халқаро кун тартибидаги масалалар юзасидан фаол алоқаларни давом эттиришга келишиб олдилар.
