Германияда ўқувчиларни тинчланишга чақирувчи ишора “кўк бўри” ишорасига ўхшагани учун тақиқланди
![Германияда ўқувчиларни тинчланишга чақирувчи ишора “кўк бўри” ишорасига ўхшагани учун тақиқланди Германияда ўқувчиларни тинчланишга чақирувчи ишора “кўк бўри” ишорасига ўхшагани учун тақиқланди](/photos/news/UTVVDz18S3bnXsW.jpeg)
Германия шимолидаги Бремен шаҳрида ҳукумат болалар боғчалари ва мактабларда жим бўлишга чақирувчи “Жим тулки” (инглизчада - silent fox) қўл ишорасини туркий халқлардаги “кўк бўри”ни англатувчи ишорага ўхшагани учун тақиқлади. Бу ҳақда Bild нашри хабар қилди.
"Жим тулки" қўл ишораси узоқ вақтдан бери сукунатни кўрсатиш учун ишлатилган, аммо эндиликда немис шаҳри маъмурлари “Кўк бўрилар” ўнг қанот экстремистик ҳаракати саломлашиига ўхшашлиги сабабли ушбу белгига муносабатини қайта кўриб чиқишга қарор қилди”, - дейилади хабарда.
Бремен таълим бошқармаси матбуот котиби Патрисия Брандтнинг айтишича, “имо-ишоранинг ўнг қанот экстремистик оқибатлари Бремен таълим муассасаларининг асосий позициясига мос келмайди”.
Эслатиб ўтамиз, футбол бўйича 2024 йилги Европа чемпионати доирасида Австрияга қарши ўйинда Туркия терма жамоаси ҳимоячиси Мерих Демирал урган голини “кўк бўри” ишорасини қўллаган ҳолда нишонлагани учун жазоланди. қарши ўйинда гол урганидан кейин «бўзқурт» ишорасини қўллагани учун дисквалификация қилди. Мазкур ҳолат Туркия ва Германия ўртасидаги сиёсий қарама-қаршиликларни келтириб чиқарди. Жумладан, Германия ички ишлар вазири турк ҳимоячисини танқид қилганидан кейин 3 июль куни Туркия Ташқи ишлар вазирлиги Германия элчисини чақиртирди. Шундан сўнг, 4 июль куни Германия Ташқи ишлар вазирлиги Туркиянинг мамлакатдаги дипломатик вакилини чақириб жавоб қайтарди.
“Кўк бўри” (Bozkurt) ёки ташкилот аъзолари таъбири билан айтганда, “Ülkü Ocakları” (“Идеалистлар жамияти”) турк миллатчилиги ва исломчилик аралашмаси бўлган турк миллатчи ташкилотидир. Алпарслан Туркеш томонидан 1969 йилда МҲП миллатчи партиясининг ёшлар ташкилоти сифатида тузилган. “Кўк бўрилар”нинг бугунги етакчиси МҲП раҳбари Девлет Баҳчели.
Ташкилот рамзи турк мифологиясидан олинган бўлиб, унда бўри душманлар устидан ғалаба қозониш рамзи, туркий халқларнинг қутқарувчиси сифатида кўрилади. Ташкилот Озарбайжон, Ўзбекистон ва Қозоғистонда тақиқланган.
Аввалроқ Германия Вакиллар палатаси ҲАМАСнинг ҳарбий қаноти Ал-Қассам бригадалари ўз видеоларида нишонларини кўрсатиш учун қўллаган қизил тескари учбурчакни тақиқлаш учун овоз берган эди.