Фарғонада синглисини уриб, ҳақорат қилган ака жазоланди

Оила муқаддас. Шахс оилада туғилиб, шаклланади ва камол топади. Оиланинг мустаҳкамлиги нафақат шу оила аъзолари учун, балки бутун жамият учун муҳимдир. Чунки, оиладаги барқарорлик ва тинчлик жамиятда ҳам ўз аксини намоён этади. Бироқ, жамиятимизда шундай оилалар борки, унда “бир қориндан талашиб тушган” жигарбандлар ўртасида мунтазам бўладиган келишмовчиликлар ва жанжаллар оддий ҳолга айланган.

Тошлоқ туман маъмурий суди томонидан 2020 йил 13 февраль куни туман ИИБ томонидан Ўзбекистон Республикаси МЖтКнинг 41-моддаси (ҳақорат) ва 52-моддасининг 2-қисми (қасддан енгил тан жароҳати етказиш) билан Б.Тиллабоев нисбатан тўпланган маъмурий иш материаллари кўриб чиқилди.

Тошлоқ туман судининг раиси А.Акрамовнинг "ANIQ.UZ"га маълум қилишича, иш ҳолатига кўра, Б.Тиллабоев 2020 йил 24 январь куни яшаш хонадонида синглиси З.Тиллабоева билан кекса онасини юмушларини бажариш юзасидан ўзаро жанжаллашиб кетиб, уни уятли сўзлар билан сўкиб, ҳақорат қилиб, танасининг турли жойларига қўллари билан уриб, енгил тан жароҳати етказган.

Суд мажлисида раислик қилувчи тарафларни муросага чақириб, энг аввало ака-сингилни тан жароҳати етказиб жанжаллашиши уятли ҳолат эканлигини, бу ҳолат келгусида ёмон оқибатларга олиб келиши мумкинлигини ва уларни ўзаро ярашиб олишлари ҳамма учун манфаатли эканлигини таъкидлаб, ҳарчанд ака-сингилни яраштиришга уринмасин тарафлар ярашув йўлини танлашмади. Иш бўйича жабрланувчи З.Тиллабоева суд мажлисида акасига қатъий жазо тайинланишини ва бу талабидан воз кечмаслигини билдириб, моддий ва маънавий зарарлар ундириш масаласини ҳам ҳал қилиб беришни сўради.

Суднинг қарорига кўра, Б.Тиллабоев Ўзбекистон Республикаси МЖтКнинг 41-моддаси ва 52-моддасининг 2-қисмида назарда тутилган маъмурий ҳуқуқбузарликларни содир этган деб топилиб, унга МЖтКнинг 34-моддасига асосан узил-кесил базавий ҳисоблаш миқдорининг ўн баравари миқдорида 2 230 000 сўм жарима жазоси тайинланди. Б.Тиллабоев жаримани бир кун давомида тўлиқ тўлади.

Жабрланувчи томонидан иш бўйича етказилган моддий ва маънавий зарар миқдорини тасдиқловчи ҳужжатлар тақдим қилинмагани сабабли, келгусида ушбу ҳужжатларни илова қилган ҳолда тегишли фуқаролик ишлари бўйича судга мурожаат қилиш ҳуқуқи борлиги тушунтирилди.

Шу ўринда, бир нарсага эътиборни қаратсак. Ака-сингил ўртасида келишмовчилик келиб чиқишининг сабаби бу уларнинг оналарини ҳолидан хабар олишдаги ўзаро тушунмовчилик. Наҳот, ўз меҳрибонлиги ва раҳмдиллиги билан донг таратган миллатимиз ҳозирга келиб ўз оналарини боқиш билан боғлиқ муносабатларда жанжаллашишса, бир-бирларига қатъий чоралар тайинланишини сўрашса?! Албатта, бу ҳолат ачинарли. Лекин, умид қиламизки бу ҳолат келгусида ўз якунини топиб, тарафлар муроса йўлини танлайдилар.