Бу йил 247 та корхонадаги давлат улушлари оммавий савдоларга чиқарилади

Ер участкалари 3 ойда сотилмаганда, бошланғич қийматининг 30 фоизигача, 6 ойда сотилмаганда – 10 фоизигача пасайтирилади ва тўловларининг 15 фоизини 3 ой муддатда, қолган қисмини 10 йилгача муддатда бўлиб-бўлиб тўлаш имконияти берилади.

Ўзбекистон Республикаси Президентининг 2024 йил 19 апрелдаги “Иқтисодиётда давлат иштирокини қисқартиришнинг қўшимча чора-тадбирлари тўғрисида”ги қарори имзоланди.

Биринчидан, қарор билан қуйидагилар тасдиқланмоқда:

1. 247 та корхонадаги давлат акция пакетлари (улушлари) оммавий савдоларга чиқарилади;
2. 1028 та кўчмас мулк объекти оммавий савдоларга чиқарилади;
3. 12 та йирик корхонадаги давлат улушларининг маҳаллий фонд бозорида бирламчи (IPO) ва (ёки) иккиламчи (SPO) оммавий таклифи ўтказилади;

(Ўзбектелеком, Ўзбекгидроэнерго, Олмалиқ КМК, Ўзбекгеологияқидирув, Ўзбекгеофизика - 2 фоиздан; Товар-хомашё биржаси - 2,4 фоиз; Темирйўлкарго, Ўзтемирйўлконтейнер - 4 фоиздан; “Тошкент” РФБ, Ўзбекистон почтаси, UzAuto Motors Powertrain, Электрон онлайн-аукционларни ташкил этиш - 5 фоиз).

Иккинчидан, давлат активларини сотишни жадаллаштириш ва иқтисодиётда хусусий сектор улушини ошириш мақсадида қуйидагилар белгиланмоқда:

1. давлат активлари 3 ойда сотилмаганда (Тошкент шаҳри ва вилоят марказлари бундан мустасно) уларнинг бошланғич баҳосининг 10 фоизигача босқичма-босқич пасайтирилади;
2. 2024 йил 1 январгача ижара шартномалари асосида ижарага олганига камида 5 йил бўлган ва мажбуриятларни бажарган тадбиркорларга хусусийлаштириш дастурларига кирган давлат мулкини баҳоланган қийматда тўғридан-тўғри сотиб олиш ҳуқуқи берилади;
3. давлат кўчмас мулкини бўлиб-бўлиб тўлаш шарти билан сотиб олган харидорлар томонидан ер ва мол-мулк солиқлари ушбу объектлар учун тўланган маблағларга пропорционал равишда ҳисобланади.

Учинчидан, қишлоқ хўжалигига мўлжалланмаган ер участкаларини сотишни тезлаштириш мақсадида қуйидаги тартиб ўрнатилмоқда:

1. ер участкалари (Тошкент шаҳри ва вилоят марказлари бундан мустасно) 3 ойда сотилмаганда, бошланғич қийматининг 30 фоизигача, 6 ойда сотилмаганда – 10 фоизигача пасайтирилади ва тўловларининг 15 фоизини 3 ой муддатда, қолган қисмини 10 йилгача муддатда бўлиб-бўлиб тўлаш имконияти берилади;
2. 4 ва 5-тоифадаги туманларда жойлашган давлат активлари ва мулк ҳуқуқи асосида сотиб олинган ер участкалари бўйича тўловлар 5 йил ичида тенг улушларда бўлиб-бўлиб тўланади. Ер участкаларини сотиб олганда уларни гаровга қўйиш учун талаб этиладиган амалдаги 35 фоиз тўлов миқдори 15 фоизга туширилмоқда.