Акмал Ҳасановга Чингиз Айтматов номидаги медаль топширилди
![Акмал Ҳасановга Чингиз Айтматов номидаги медаль топширилди Акмал Ҳасановга Чингиз Айтматов номидаги медаль топширилди](/photos/news/2KpjzBYteZVWHVw.jpeg)
Ёдингизда бўлса, ўзбекистонлик бокс мураббийи Акмал Ҳасанов Париж-2024 Олимпиадасида қирғизистонлик боксчи Мунарбек Сейитбек уулуга секундантлик қилганди.
Финалга қадар етиб келган Мунарбек якунда Олимпиаданинг кумуш медалини қўлга киритганди. Финал жангида у ҳамюртимиз Абдумалик Ҳалоковга имконияни бой берганди. Мунарбекнинг медали қирғиз боксчиларининг Олимпиададаги илк медали бўлгани билан яна ҳам аҳамиятли эди.
Бугун Тошкентда Шанхай ҳамкорлик ташкилоти халқ дипломатияси форуми доирасида Акмал Ҳасанов қўшни мамлакат томонидан муносиб тақдирланди. Қирғиз Республикасида хизмат кўрсатган маданият ходими, Чингиз Айтматов номидаги Иссиқ-Кўл форуми бош котиби Ассол Молдокматова ушбу мукофотни Акмал Ҳасановга топширди.
Мураббийимизнинг бу ҳаракати икки давлат ўртасидаги инсонпарварлик, бағрикенглик, дўстона муносабатларнинг янада мустаҳкамланиб бораётганининг ёрқин намунаси бўлди.
Шунингдек, Ассол Молдокматова мураббийимизга Иссиқ-Кўлга дам олиш учун йўлланма, миллий чопон ҳамда таниқли мўйқалам устаси Сабитжан Бабажанов томонидан чизилган суратни топширди.