Xitoy ta’lim sohasida ham O‘zbekistonning eng yaqin sheriklaridan biri

Hozirgi yoshlarning dunyoqarashi, fikrlashi, hayotga, ta’lim olishga qiziqishi o‘zgacha. Ular zamonaviy bilim egallash, malakali mutaxassis bo‘lib yetishish maqsadida yurtimiz oliy o‘quv yurtlari qatori dunyoning yetakchi davlatlarining nufuzli ta’lim dargohlarida o‘qishni istamoqda. Yoshlarning intilishi, qiziqishini ro‘yobga chiqarish uchun ta’lim sohasi juda rivojlangan davlatlar bilan hamkorlikni yo‘lga qo‘yish hukumatimizning doimiy e’tiboridagi masala. Jumladan, Xitoy Xalq Respublikasi ayni yo‘nalishdagi eng yaqin, manfaatli sheriklarimizdan biri.

Diplomatik aloqa o‘rnatilgandan buyon o‘tgan 31 yil mobaynida Xitoy – O‘zbekiston munosabati izchil rivojlandi. Keyingi yillarda ikki davlat rahbarlari olib borayotgan oqilona siyosat tufayli har tomonlama strategik sheriklik jarayoni yuksak bosqichga ko‘tarildi. “Bir makon, bir yo‘l” loyihasi esa azaliy do‘stlik rishtasini tobora mustahkam bog‘lab, avloddan-avlodga yetib borishini ta’minlashga zamin yaratmoqda.

Mamlakatimizda XXRning bir necha oliy ta’lim maskani filiali ochilgan, ko‘plab yigit-qizlarimiz Chin diyorida ta’lim olishmoqda.

Xitoy va O‘zbekiston o‘rtasida 1993 yil ilmiy darajalarni o‘zaro tan olish, 1999 yil esa ta’lim sohasida hamkorlik to‘g‘risida shartnomalar imzolangan. Ushbu hujjatlar stipendiya almashinuvi uchun chet ellik talabalar sonini oshirish, universitetlar o‘rtasidagi hamkorlikni qo‘llab-quvvatlash va rag‘batlantirish, o‘qituvchilar almashinuvini yo‘lga qo‘yish uchun huquqiy asos yaratgan.

Xitoyning mamlakatimizdagi elchixonasi taqdim etgan ma’lumotga ko‘ra, hozirgi kunda 4 mingga yaqin o‘zbekistonlik yosh tolib Xitoy oliy ta’lim maskanlarida tahsil olmoqda.

2008 yil Xitoy tomonidan Shanxay hamkorlik tashkiloti stipendiyasi ta’sis etilgan. Shundan buyon tashkilotga a’zo barcha davlatlar qatori O‘zbekistondan borgan talabalarga ham davlat stipendiyasi berib kelinmoqda. Bu ta’lim sohasidagi hamkorlik faol rivojlanishiga hissa qo‘shmoqda.

Xorijlik talabalarga qo‘shimcha qulaylik, imkoniyat yaratilayotgani bois, ko‘plab o‘zbekistonlik yoshlar har yili 100 ga yaqin talabaga davlat stipendiyasi taqdim etilayotgan Xitoyda o‘qishni afzal ko‘rmoqda.

Bugungi kunda Xitoy Toshkent davlat sharqshunoslik universiteti, O‘zbekiston davlat jahon tillari universiteti, Jahon iqtisodiyoti va diplomatiya universiteti, Namangan muhandislik-texnologiya instituti, Buxoro davlat universiteti singari 18 oliy o‘quv yurtlarimiz bilan rasman hamkorlik qilib kelyapti.

Tabiiyki, talabalar almashinuvi dasturlari orqali yurtimizda o‘qiyotgan xitoylik o‘g‘il-qizlar ham talay va ayni ko‘rsatkich yil sayin o‘smoqda. Ikki davlat oliy ta’lim maskanlari sherikligi chuqurlashishi Lanchjou universiteti, Shimoli-g‘arbiy universitet va Toshkent davlat sharqshunoslik universiteti, Pekin ikkinchi chet tillar instituti, Sian xalqaro tadqiqotlar universiteti, Shimoli-g‘arbiy universitet va Ipak yo‘li xalqaro turizm va madaniy meros universiteti, Shimoli-g‘arbiy siyosatshunoslik va huquq universiteti va Toshkent davlat yuridik universiteti o‘rtasidagi yaqin aloqa, doimiy muloqotda namoyon.

Pekin ikkinchi chet tillar instituti rektori yordamchisi, professor Szou Tunsyan “Ipak yo‘li” turizm va madaniy meros xalqaro universiteti prorektori lavozimida faoliyat yurityapti.

Tyanszin dengizchilik kasb-hunar kolleji va Toshkent davlat transport universiteti o‘rtasida memorandum imzolangan. Kasb-hunar ta’limi sohasi uchun malakali kadrlar tayyorlash maqsadida, hamkorlikda “LuBan” sexi tashkil etilishi ko‘zda tutilgan.

Shu o‘rinda aytish kerak, xitoy tilini o‘rganish ancha qiyin. Shu bois, mazkur xorijiy tilni puxta o‘zlashtirish niyatidagi yoshlar uchun mamlakatimizda qator qulayliklar yaratilgan.

Ayni payt O‘zbekistonda 2 ta Konfusiy instituti faoliyat ko‘rsatmoqda – Toshkentda va Samarqandda. Hozirgacha bu institutlarda 10 ming nafardan ziyod mutaxassis tayyorlandi. Bu yurtimizda xitoy tilini o‘rgatish darajasi oshishi, yoshlarimizning Xitoy haqidagi dunyoqarashi boyishiga xizmat qilmoqda.

Mamlakatimizda xitoy tili milliy ta’lim sohasidagi 8 ta ustuvor xorijiy tillar ro‘yxatiga kiritilgan. Xitoy tilini o‘rganishga qiziqishni kuchaytirish, ko‘proq o‘g‘il-qizlarni til o‘rganishga jalb etish maqsadida “Xitoy tili ko‘prigi” tanlovi, “Xitoy ko‘prigi” yozgi oromgohi kabi tadbirlar tashkil etiladi. Bu sa’y-harakatlar xorijiy tilni puxta o‘rganish, xalqlarimiz o‘rtasidagi do‘stlik rishtasini mustahkamlashga ko‘maklashmoqda.