Vafot etgan qaynonaning nomidagi hovli kimga o‘tadi?
— O‘tgan yili qaynonamni nomiga hovli sotib olgandik. Yaqinda u kishi vafot etdi. Eshitishimizcha, bunday vaziyatda uy avtomatik ravishda qaynotamning nomiga o‘tar ekan. Qaynotam uzoq vaqt yolg‘iz yashamaydi. Birortasiga uylanib olmasidan uyni erimning nomiga o‘tkazib olsak bo‘ladimi?
Ismi sir tutildi
Amina Xudaybergenova, fuqarolik ishlari bo‘yicha M. Ulug‘bek tumanlararo sudi sudyasi:
— Amaldagi qonunchilikka ko‘ra, vorislik vasiyat va qonun bo‘yicha amalga oshiriladi. Vasiyatnoma mavjud bo‘lmaganda yoki vasiyat butun merosning taqdirini belgilamasa qonun bo‘yicha vorislik amalga oshiriladi. Meros ochilgan paytda hayot bo‘lgan fuqarolar, shuningdek, meros qoldiruvchining hayotlik paytida homila xolida bo‘lgan va meros ochilgandan keyin tirik tug‘ilgan bolalari vasiyat va qonun bo‘yicha merosxo‘r bo‘lishlari mumkin. Merosxo‘r o‘ziga tegishi lozim bo‘lgan merosni yoki uning bir qismini olish huquqiga meros ochilgan vaqtdan e’tiboran ega bo‘ladi.
Agar qaynonangiz tomonidan o‘ziga tegishli mol-mulkni tasarruf qilish to‘g‘risida vasiyatnoma qoldirilgan bo‘lmasa, qaynonangizning nomidagi barcha mol-mulklar qonun bo‘yicha birinchi navbatdagi vorislari, ya’ni meros qoldiruvchining bolalari, eri va ota-onasi o‘rtasida teng ulushlarda taqsimlanadi. Ushbu holatda merosxo‘rlar meros ochilgan kundan e’tiboran istalgan vaqtda meros ulushidan merosxo‘rlardan birining foydasiga voz kechishi mumkin. Merosdan voz kechish merosxo‘r tomonidan meros ochilgan joydagi notariusga ariza berish yo‘li bilan amalga oshiriladi. Merosni qabul qilib olgan qonun bo‘yicha merosxo‘rlardan istalgan biri merosning taqsimlanishini talab qilishga haqli. Ya’ni ushbu holatda marxum qaynonangizning nomidagi mol-mulk uning merosxo‘rlari o‘rtasida taqsimlanadi. Merosxo‘rlar eringiz foydasiga o‘z ulushidan voz kechgan taqdirda ushbu uy-joyni o‘z nomiga rasmiylashtirishi mumkin bo‘ladi. Meros masalasida o‘zaro kelishuvga erishilmaganda nizo sud tartibida hal qilinadi.
