Toshkentda pora bilan qo‘lga tushgan inspektorga hukm o‘qildi

Korrupsiya barcha islohotlar ildiziga urilayotgan bolta ekani va unga qarshi kurashish borasida tinimsiz ishlar olib borilayotganiga qaramay, nafs balosiga yengilayotganlar uchrashi dilni xufton qiladi...

Sudlanuvchi 2021 yilning aprelidan tuman Ichki ishlar organlari faoliyatini muvofiqlashtirish bo‘limi 1-son huquqbuzarlik profilaktikasi bo‘linmasi profilaktika katta inspektori lavozimida faoliyat yuritgan. U tumandagi Mahalla fuqarolar yig‘ini huquq tartibot maskanida huquqbuzarlik va jinoyatchilikning oldini olishga mas’ul edi. Ammo u xonadoniga ijarachi qo‘ygan uy egasidan 500 000 so‘m pora talabi bilan o‘zining xizmat vakolatini suiiste’mol qilgan...

“HARAKATLARI SHUBHA UYG‘OTDI”

Voqea tafsilotlarini sudda uy egasi quyidagicha bayon etdi:

— Oilaviy sharoitim og‘irligi sababli otamning nomida bo‘lgan uyni olti nafar talaba qizlarga har oyda 3.000.000 so‘m ijara haqi to‘lash sharti bilan ijaraga bergandim. Biroq ular bilan notarial tartibda ijara shartnomasi rasmiylashtirmaganman. Oradan 3-4 kun o‘tib, bir yigit qo‘ng‘iroq qilib, hudud profilaktika inspektori xonasiga borishimni aytdi. Borganimda, o‘zini ushbu mahalla profilaktika inspektori deb tanishtirdi. “Uyga noqonuniy tarzda fuqarolarni ijaraga qo‘yibsiz”, deb tushuntirish xati yozdirdi. Ijarada turgan qizlarni chaqirtirishini aytdi. Ijarachi qiz kelib, holat yuzasidan tushuntirish xati yozib berdi. Menga “mana hujjatlar”, deya qo‘li bilan ko‘rsatib, 1.500.000 so‘m jarima to‘lashimni aytdi. Unga “hozir sharoitim og‘ir”, dedim. U bo‘lsa, “turmush o‘rtog‘ingizni chaqirtirib, o‘zim gaplashib olaman”, dedi. Xo‘jayinim kela olmasligini aytib, nima gapi bo‘lsa o‘zim bilan gaplashishini bildirdim. 500-600 ming atrofida jarima to‘lashim kerakligini, boshqa hech kim bu ishni hal qilmasligini aytdi. Pulni ularning o‘ziga to‘lashim va rasmiylashtirilgan hujjatlar o‘zida turishini, pulni olib kelib berganimdan so‘ng meni boshqa umuman bezovta qilmasligini qistirib o‘tdi. Oradan bir necha kun o‘tib, ijarada turgan qizlar qo‘ng‘iroq qilib, “profilaktika inspektori qo‘ng‘iroq qildi. Bizga jarima yozilibdi, to‘lab ketishimiz kerak ekan”, deyishdi. Profilaktika inspektoriga qo‘ng‘iroq qilib, qizlarga nimaga jarima yozganini so‘radim. “Vaqtincha ro‘yxatda turmasdan uyingizda yashayotgani uchun jarima to‘lashlari kerak, gapni ko‘paytirmang”, deb xayrlashdi. Harakatlari shubha uyg‘otdi. Uning gaplarini diktofonga yozib olib, huquqni muhofaza qiluvchi organlarga taqdim etish uchun yana profilaktika inspektori xonasiga bordim. “Qizlarni bezovta qilmang, qancha pul berishim kerak”, desam 540 000 so‘m bo‘lishini aytdi. Sal kelishtirishini so‘raganimda, “500 000 so‘m bering”, dedi. Qaysi kuni ko‘rishishimizni aytib xayrlashdim. So‘ng ichki ishlar xodimining qonunga xilof xatti-harakatlariga chek qo‘yish maqsadida tegishli organga ariza bilan murojaat qildim. O‘tkazilishi rejalashtirilayotgan tezkor tadbirda o‘z xohishim bilan ishtirok etishimni bildirdim. Arizamga asosan menga 500 000 so‘m pul va bo‘lib o‘tadigan suhbatlarni yozib olish maqsadida ovoz yozish moslamasini ham xolislar ishtirokida bayonnoma asosida taqdim qilishdi.

Profilaktika inspektori xonasiga kirdim. 500 000 so‘mni ko‘rsatib, “bo‘ldimi, boshqa bizni bezovta qilmaysizmi?” deb pulni unga berdim. Sanamay kitobning ichiga solib qo‘ydi. Tezkor xodimlar xolislar ishtirokida profilaktika inspektorining xonasiga kirib, uni ushlashdi.

Sudlanuvchi aybiga iqror...

Sudlanuvchi sobiq inspektor sud majlisida aybiga to‘liq iqrorligi va qilmishidan qattiq pushaymonda ekanini bildirdi. Unga qilmishiga yarasha jazo tayinlandi.

Jamoliddin NAJIMOV, jinoyat ishlari bo‘yicha Olmazor tuman sudi sudyasi:

— Sudlanuvchi Jinoyat kodeksining 210-moddasi (pora olish) 1-qismida nazarda tutilgan jinoyatni sodir qilganlikda aybli deb topildi. Shu modda bilan 3 yil ozodlikdan mahrum qilish jazosi hamda 2 yil muddatga mansabdorlik bilan bog‘liq ishlarda ishlash huquqidan mahrum qilish jazosi tayinlandi. Jazoni manzil koloniyalarda o‘tash belgilandi.

Sadoqat ALLABERGANOVA