Toshkent shahrida faoliyat yuritayotgan korxona va tashkilotlar diqqatiga!

O‘zbekiston Respublikasiga koronavirusning kirib kelishi va tarqalishini oldini olish yuzasidan chora-tadbirlar dasturini tayyorlash bo‘yicha respublika maxsus komissiyasining 2020 yil 23 martdagi 10-son bayoniga muvofiq, Toshkent shahriga har qanday transport vositasida (avtobus, avtomobil, avia, temir yo‘l) respublikaning barcha hududlaridan kirish va Toshkent shahridan respublikaning barcha hududlariga chiqishini joriy yilning 24 mart kuni soat 00:01 dan boshlab to‘xtatish to‘g‘risida qaror qabul qilingan.

Toshkent viloyatida istiqomat qilib, Toshkent shahrida mehnat qilayotgan fuqarolarning korxona va tashkilotlariga kelishi va ketishi bo‘yicha barcha ishlar 2020 yil 24 martdan boshlab “Toshshahartransxizmat” AJ tomonidan shartnoma asosida amalga oshirilishini ma’lum qilamiz.

“Toshshahartransxizmat” AJ tomonidan taqdim etilayotgan avtobuslarning har biri maxsus taniqlilik belgisi (emblema), yo‘lovchining tana haroratini o‘lchash uchun teplovizor bilan jihozlanadi. Shuningdek, har bir avtobus har kuni dezinfeksiya qilinishi to‘liq ta’minlanadi.

Har bir yo‘lovchining tana harorati avtobusga kirishdan kamida 
5 metr masofada o‘lchanadi va harorati yuqori bo‘lgan yo‘lovchi avtobusga chiqarilmaydi.

Barcha masalalar bo‘yicha “Toshshahartransxizmat” AJga 712441863 va 712335147 telefon raqamlari orqali murojaat etishingiz mumkin.