Rossiya Xarkovni bombaladi
Ukraina rasmiylari Ukraina shimoli-sharqidagi Xarkov shahriga Rossiya havo hujumi uyushtirilishi oqibatida o‘nlab tinch aholi jarohatlangan, deya xabar bermoqda.
Ukraina prezidenti Vladimir Zelenskiy ko‘p qavatli turar-joy binosi vayron bo‘lgani va 9-12-qavatlar orasida yong‘in chiqqanini aytdi.
Telegram xabar almashish xizmatida Zelenskiy 35 kishi, jumladan, uch bola jarohatlanganini aytdi.
Keyinroq Xarkov meri Igor Terexovning aytishicha, 41 kishi jarohatlangan, ulardan to‘rt nafari bolalar.
Rossiya kuchlari shimoli-sharqda olg‘a intilishga urinayotgan bir paytda Ukrainaning aholisi eng ko‘p bo‘lgan ikkinchi shahri tobora ko‘proq zarbalar nishoniga aylanib bormoqda. May oyi boshida Rossiya Xarkov viloyati shimolidagi bir qancha qishloqlarni nazorat ostiga olgan.
