Rishtonda IIB xonasida hushini yo‘qotgan fuqaro bo‘yicha ma’lumot berildi
Rishton tumanida IIB xonasiga olib kirilgan fuqaro hushini yo‘qotib, reanimasiyaga yotqizilgani holati yuzasidan Farg‘ona viloyati IIB rasmiy munosabat berdi.
Ma’lum qilinishicha, joriy yil 4 iyul kuni Rishton tumanining Gumbaz mahallasida fuqaro R.M. Cobalt mashinasida qarama-qarshi yo‘nalishda harakatlanib, “To‘xtash ta’qiqlanadi” yo‘l belgisi ta’sir doirasiga mashinasini qo‘ymoqchi bo‘lgan. IIO xodimlari unga huquqbuzarligini tushuntirmoqchi bo‘lishgan.
“Biroq R.M. xodimlarining qonuniy talabini bajarmasdan, haqorat qilib, transport vositasini shu yerda turgan fuqarolar va IIB xodimlari ustiga harakatlantirgan. Shundan so‘ng huquqbuzarlik sodir etayotgan shaxs zararsizlantirilib, majburiy tarzda IIO tayanch punktiga olib borilgan. Tayanch punktiga uning akasi M.R. ham kelib, baqir-chaqir qilgan holda xodimlarga qarshilik ko‘rsatgan.
Shu payt R.M.ning tutqanog‘i tutib, o‘zini yo‘qotgan (fuqaroning muqaddam avtohalokat oqibatida orttirilgan epilepsiya kasalligi bo‘lgan). Fuqaroga tez tibbiy yordam ko‘rsatilib, uyiga javob berilgan”, deyiladi IIB rasmiy munosabatida.
Qayd etilishicha, tibbiy ko‘rik jarayonida fuqaroga jarohat yetkazilgan holati aniqlanmagan.
Hozirda fuqaro R.M. va akasi M.R.ga nisbatan Ma’muriy jaaobgarlik to‘g‘risidagi kodeksning 183-, 194-, va 195-moddalari tartibida hujjatlar rasmiylashtirilib qonuniy chora ko‘rish uchun sudga yuborilgan. Shuningdek, xodimlarning harakatlariga huquqiy baho berish uchun xizmat tekshiruvi tayinlangan.
IIB rasmiy munosabat bilan birga o‘sha holatda xodimlarning bodikamerasiga tushirilgan tasvirlarni ham e’lon qildi.
Voqeaga guvoh bo‘lgan haydovchining jiyani xodimlardan biri akasining qo‘liga elektroshoker ishlatganini, keyin esa sudrab, xizmat xonasiga olib kirib ketishganini, uni xonada ko‘pchilik bo‘lib kaltaklashganini bildirgandi. IIB xonasidan hushsiz holatda chiqqan fuqaro tezkorlik bilan reanimasiya bo‘limiga olib borilgan. U hamon o‘ziga kelmayotgani aytilmoqda.
