Qirg‘izistonda davlat bayrog‘i o‘zgardi

Sadir Japarov Qirg‘iziston bayrog‘ini o‘zgartirish haqidagi qonunni imzoladi. Bu haqda Sputnik Qirg‘iziston xabar qildi.

20 dekabr kuni Yuqori Kengash mazkur hujjatni ikkinchi va uchinchi o‘qishda muhokamasiz ma’qulladi.

Bayroq tasviri tushirilgan barcha turdagi rasmiy hujjatlar amal qilish muddati tugagunga qadar amal qiladi, shuningdek, bayroq tasvirlangan davlat raqamlari va avtomashinalarni ro‘yxatdan o‘tkazish guvohnomalari esa tegishli organ ularni almashtirish to‘g‘risida qaror qabul qilgunga qadar amal qiladi.

Qirg‘izistonda yangi bayroq ko‘tarilganda ham eski bayroqni hurmat qilish talablari o‘z kuchida qoladi. Bu haqda Sadir Japarov ko‘rsatma berdi, dedi prezident matbuot kotibi Askat Alagozov.

Unga ko‘ra, bayroqni o‘zgartirish to‘g‘risidagi qonun “Erkin-Too” gazetasida (kelasi hafta seshanba kuni e’lon qilinadi) e’lon qilingan kundan boshlab kuchga kiradi.

"Vazirlar Mahkamasi Davlat bayrog‘ining texnik shartlarini tasdiqlashi kerak. Buning asosida yangi bayroq tayyorlanadi va binolardagi bayroqlar almashtiriladi", - deya tushuntirdi Alagozov.

Bu biroz vaqt talab etadi, dedi u.