Qashqadaryoda soliqdan qarzdor fuqarolarning plastik kartochkalari bloklab qo‘yildi
Qashqadaryoda soliqdan qarzdorligi bo‘lgan fuqarolarning plastik kartochkasi qarzdorlik bartaraf etilguniga qadar vaqtincha qulflab qo‘yilmoqda. Bu haqda «Turon 24»ga viloyat davlat soliq boshqarmasining jamoatchilik bilan aloqalar va huquqiy axborot sho‘’basi boshlig‘i Firdavsiy Jabborov ma’lum qildi.
Joriy yilning 1 oktyabridan fuqaroning soliqdan qarzdorligini undirish uchun soliq to‘lovchi jismoniy shaxsning plastik kartalariga xizmat ko‘rsatuvchi bank hisob varaqlaridan oyiga eng kam oylik ish haqining ikki baravari miqdoridan ko‘p bo‘lmagan miqdordagi mablag‘ ogohlantirishsiz yechib olinadi. Bunday amaliyot Prezidentning «Davlat soliq xizmati organlari faoliyatini tubdan takomillashtirish chora-tadbirlari to‘g‘risida»gi qaroriga muvofiq joriy etilmoqda.
«Biz to‘g‘ridan-to‘g‘ri aholining plastik kartochlaridan pulni yechib olishdan oldin vaqtincha bloklab qo‘yish chorasini qo‘lladik, — deydi Firdavsiy Jabborov. — Fuqaro bundan xabar topgach, soliqdan qarzdorligi sabab plastik kartochkasi qulflab qo‘yilganini bildiramiz, qarzdorlikni bartaraf etish bo‘yicha ogohlantiramiz».
Soliq idoralari tomonidan soliqdan qarzdorligi bo‘lgan jismoniy shaxslarning bank plastik kartochkalarida operasiyalarni vaqtincha to‘xtatib turish uchun tijorat banklariga ma’lumotlar taqdim etildi. Qarzdorlik bartaraf etilgach, bank plastik kartochkalari yana ochib beriladi.
Viloyatda 509 mingdan ortiq soliq to‘lovchi jismoniy shaxs bor. Soliqdan qarzdorlar soni 152 ming nafarni, qarzdorlik summasi esa 28 milliard so‘mni tashkil etadi.
