Qashqadaryo viloyatini rivojlantirish bo‘yicha ustuvor vazifalar muhokama qilindi​​​​​​​

Prezident Shavkat Mirziyoyev Qashqadaryo viloyatida islohotlar natijadorligi hamda kelgusida amalga oshirilishi lozim bo‘lgan ustuvor vazifalar yuzasidan yig‘ilish o‘tkazdi.

Qashqadaryo o‘zining katta hududi, boy tabiiy resurslari, rivojlangan sanoati, mehnatkash va tadbirkor xalqi bilan ulkan salohiyatga ega ekani ta’kidlandi.

O‘tgan yili yalpi hududiy mahsulotda 6,8 foiz, sanoatda 7,2 foiz, xizmatlar sohasida 13,6 foiz, qishloq xo‘jaligida 4,3 foizlik o‘sish qayd etildi. 2017-2025 yillarda aholi jon boshiga yalpi hududiy mahsulot hajmi 3,2 barobar o‘sib, 26,9 million so‘mga yetdi. Ishsizlik va kambag‘allik darajasi tegishli ravishda 4,9 va 6,5 foizgacha tushdi.

2026 yilda iqtisodiyot tarmoqlarida yangi loyihalarni amalga oshirish hisobidan sanoatda 8,6 foizlik o‘sishni ta’minlash, 3,5 milliard dollar investisiya hisobiga 727 million dollarlik mahsulot eksport qilish rejalashtirilgani qayd etildi. Natijada viloyat iqtisodiyoti 8,2 foizga, xizmatlar 15,9 foizga, qurilish 13,2 foizga, qishloq xo‘jaligi 5,8 foizga o‘sishi kutilmoqda.

Sanoatda 1,7 milliard dollarlik 195 ta loyihani ishga tushirish, ishlab chiqarish quvvatlarini kengaytirish hamda mikrosanoat markazlari tashkil etish orqali tarmoqlarda yuqori o‘sish sur’atlarini ta’minlash zarurligi qayd etildi.

Viloyatda qator yirik sanoat loyihalarini amalga oshirish rejalari haqida axborot berildi. Jumladan, mato, kiyim-kechak va gigiyenik vositalar, qishloq xo‘jaligi texnikasi va uskunalari, elektr avtomobillari uchun quvvatlash stansiyalari, fibrosementli panellar va devor plitalarini ishlab chiqarish quvvatlarini tashkil etish ko‘zda tutilgan.

Shuningdek, Muborak maxsus innovasion sanoat zonasi va Qarshi yashil texnologiyalar sanoat zonasini tashkil etib, 2026-2027 yillarda ularda 1,1 milliard dollardan ziyod bo‘lgan 36 ta loyihani amalga oshirish va 6 mingga yaqin yangi ish o‘rni yaratish rejalashtirilgan.

Yangi yondashuvlar asosida mahallalarni chuqur va o‘rta ixtisoslashtirish, imtiyozli kredit va subsidiyalar ajratish hisobiga kambag‘allikni qisqartirish zarurligi ko‘rsatib o‘tildi. Xususan, mahallalarda 820 milliard so‘mlik kreditlar, 52,3 milliard so‘mlik ssuda va subsidiyalar ajratish, o‘zini o‘zi band qilganlarni qo‘llab-quvvatlash orqali 48 mingta tadbirkorlik sub’ekti tashkil etiladi, 31 mingta mikroloyiha amalga oshiriladi.

Natijada 2026 yil yakuniga qadar ishsizlikni 3,2 foizga, kambag‘allikni 3 foizga tushirish, bunda G‘uzor, Qamashi, Ko‘kdala, Mirishkor, Shahrisabz va Yakkabog‘ tumanlarini kambag‘allik va ishsizlikdan xoli hududga aylantirish maqsad qilingan.

Dunyoda go‘sht narxlari oshib borayotgan hozirgi sharoitda viloyatda chorvachilik va ozuqa bazasini mustahkamlash, yaylov yerlaridan unumli foydalanish bo‘yicha yangi tizim joriy etilayotgani ta’kidlandi.

Bunda 2030 yilgacha 200 ming gektar, shu jumladan, 2026 yilda 15 ming gektar yerni o‘zlashtirish, infratuzilma bilan ta’minlash orqali ozuqa ekinlari, kartoshka, sabzavot, dukkakli va moyli o‘simliklar yetishtirish hajmlarini oshirish vazifasi qo‘yildi.

Joriy yilda g‘alla hosildorligini o‘rtacha 84,8 sentnerga, paxta hosildorligini 47,5 sentnerga, kartoshka hosildorligini 175 sentnergacha oshirish rejalashtirilgan. Shuningdek, 48 ta g‘alla kombayni, 272 ta chigit ekish seyalkasini xarid qilish, suv tejovchi texnologiyalar va zamonaviy agrotexnologiyalarni joriy etish hisobiga qishloq xo‘jaligida daromadni 20-35 foizga oshirish imkoni mavjudligi ko‘rsatildi.

Suv ta’minoti Qashqadaryo uchun eng og‘ir masalalardan ekani qayd etildi.

Ekinlarning katta qismi nasos orqali sug‘orilishi sharoitida 2026 yilda 320 kilometr magistral va 3,3 ming kilometr ichki kanallarni betonlash, 70,6 ming gektarda suv tejovchi texnologiyalarni joriy etish, 27,4 ming gektarda lazerli tekislash ishlarini amalga oshirish hamda 16 ta nasos stansiyasini modernizasiya qilish vazifalari belgilandi. Bu orqali 800 million kub metrgacha suv iqtisod qilinishi kutilmoqda.

Ichimlik suvi ta’minotini yaxshilash maqsadida Hisorak suv omboridan Qarshi shahriga suv tortish loyihasi ishlab chiqilayotgani ma’lum qilindi. Ushbu loyiha doirasida 16 ta ichimlik suvi inshooti va 416 kilometr tarmoq quriladi. Qarshi va Shahrisabz shaharlari, Dehqonobod va Qamashi tumanlaridagi kanalizasiya tarmoqlari rekonstruksiya qilinadi.

Turizm salohiyatini to‘liq ishga solish bo‘yicha yiliga 1 million sayyohni jalb qilayotgan Miraki shaharchasi tajribasi asosida yangi loyihalarni qolgan tumanlarda ham kengaytirish zarurligi ta’kidlandi.

Qamashi tumanida “Maydanak” baland tog‘ turizm markazini tashkil etish, Shahrisabz tumanida bir vaqtning o‘zida 13 ming sayohatchiga xizmat ko‘rsatadigan “G‘elon” xalqaro umummavsumiy kurortini barpo etish, Yakkabog‘ tumani Tatar qishlog‘ida turizmni rivojlantirish, Hazrati Sulton cho‘qqisi hududida treking yo‘nalishlari va chodirli uylar oromgohini tashkil etish loyihalari shular jumlasidan.

Umuman, joriy yilda 45 ta mehmonxona va mehmon uyi tashkil etilib, qo‘shimcha 1130 o‘rin yaratilishi belgilandi.

Viloyatda yo‘l, uy-joy va muhandislik-kommunikasiya infratuzilmasini yaxshilash bo‘yicha ham aniq dasturlar muhokama qilindi. “Yangi O‘zbekiston” qiyofasidagi 2 ta tuman va 46 ta mahallada, shuningdek, og‘ir toifadagi 3 ta tuman va 108 ta mahallada ichki yo‘llar, suv ta’minoti, sug‘orish infratuzilmasi hamda elektr tarmoqlarini yaxshilash uchun jami 864 milliard so‘m mablag‘ yo‘naltirilishi belgilandi.

Ijtimoiy yo‘nalishda oila va xotin-qizlarni qo‘llab-quvvatlash, sog‘liqni saqlash tizimini rivojlantirish bo‘yicha ko‘rsatkichlar belgilandi. Jumladan, yangi davlat va xususiy bog‘cha, maktablar tashkil etish, 120 ming nafar xotin-qizning bandligini ta’minlash, 21,1 ming nafarini kasb-hunar va tadbirkorlikka o‘qitish, “Ayollar daftari” orqali 102 ming nafariga yordam ko‘rsatish choralari nazarda tutilgan.

Germaniya bilan hamkorlikda tartibli mehnat migrasiyasi va kasbiy tayyorgarlik bo‘yicha yangi tashabbuslar taqdim etildi. 2026 yilda 3000 nafar, 2027 yilda 5000 nafar yoshni Germaniyaga ishga yo‘naltirish, ularni o‘qitish uchun Qarshi shahrida Ta’lim va texnologiyalar markazini ochish rejalashtirilgan.

Yig‘ilish yakunida davlatimiz rahbari belgilangan vazifalar ijrosini qat’iy nazoratga olish, investisiya va eksport ko‘rsatkichlarini ta’minlash, yangi ish o‘rinlari yaratish hamda aholi turmush darajasini oshirish bo‘yicha mutasaddilarga aniq topshiriqlar berdi.