«Paxtakor» «As-Sadd»ni mag‘lub etib, pley-offga chiqish imkoniyatini saqlab qoldi

OFK Elit Chempionlar Ligasining 8-tur o‘yinlari 17 fevral, dushanba kuni bo‘lib o‘tdi.

Toshkentning “Paxtakor” jamoasi o‘z maydonida “As-Sadd”ni qabul qildi. Uchrashuv davomida bir qator xavfli vaziyatlar yaratildi.

Uchrashuvning 18-daqiqasida “Paxtakor” a’zosi Brayan Riaskosni hisobni ochdi. 37-daqiqaga kelib Hasan Al-Haydos penaltidan hisobni tenglashtirdi.

O‘yinning 56-daqiqasida esa “Paxtakor” a’zosi Jonatan Lukkaning jarimadan yo‘llagan zarbasi raqib “jonli devor”iga tegib qaytdi, qaytgan to‘pni Riaskos bosh bilan “As-Sadd” darvozasiga kiritdi.

65-daqiqada mehmonlar vakili Adam Muhammad Unas va “sherlar” yarim himoyachisi Sardor Sobirxo‘jayev o‘rtasida tortishuv yuzaga keldi va har ikki futbolchi maydondan chetlatildi.

"Paxtakor" ushbu g‘alabadan keyin Elit Chempionlar ligasi jadvalida 7 ochko bilan 7-o‘ringa ko‘tarildi.

"Sherlar" pley-offga chiqish uchun Eronning "Persepolis" va "Istiqlol" klublari 8-turda ochko yo‘qotishi yoki Qatarning "Al-G‘arafa" jamoasi mag‘lub bo‘lishi kerak (mazkur 3 ta shartdan 2 tasi bajarilishi kerak).

Elit Chempionlar Ligasi, 8-tur bahsi
17 fevral, dushanba
“Paxtakor” - “As-Sadd” 2:1
Gollar: 1:0 – 18, Brayan Riaskos, 1:1 – 37, Hasan Al Haydos, 2:1 – 56, Brayan Riaskos
“Paxtakor”: Jonatan, Hojiakbar Alijonov, Abdulla Abdullayev, Shahzod Azmiddinov, Umar Adhamzoda, Jonatan Lukka, Sardor Sobirxo‘jayev, Doston Hamdamov (Ulug‘bek Hoshimov, 80), Diyor Xolmatov (Abdurauf Bo‘riyev, 80), Flamarion (Otabek Jo‘raqo‘ziyev, 87), Brayan Riaskos (Bashar Resan, 72).
“As-Sadd”: Ash Shib, Atal (Xidir, 80), Bunosir, Huhi, Al Yazidi (Abdulatif, 80), Unas, Gillerme (Sayyor, 32), Baqir, Al Haydos, Abdurisag (Muxika, 72), Kristo.
Ogohlantirishlar: Sobirxo‘jayev (49), Bunosir (55).
Chetlatishlar: Unas (65), Sobirxo‘jayev (68), Azmiddinov (90+9).