"Paxtakor" akademiyasi O‘zbekiston rekordini o‘rnatdi

O‘zPFL tomonidan o‘tkazilgan U-19 musobaqasi finalida "Nasaf"ni mag‘lubiyatga uchratgan "Paxtakor" akademiyasi bugun O‘FA Kubogining navbatdagi yosh toifalarida chempionlikni qo‘lga kiritdi.

O‘zPFLdan keyingi 4 ta yosh bo‘yicha musobaqalarni O‘FA o‘tkazadi va unda bu yil 2009, 2010, 2011 hamda 2012 yillarda tavallud topgan futbolchilar bosh sovrin uchun kurash olib bordilar. U-19 musobaqasida "Paxtakor"ning 2006-2009 yillardan iborat tarbiyalanuvchilari musobaqada qatnashdi.

Dastlab "Paxtakor"ning 2012 va 2011 yillarda tavallud topgan futbolchilari turnirdagi ishtiroklarini boshladilar. 2011 yillar guruhdan chiqqanidan keyin "Odil Ahmedov" akademiyasini 8:0 hisobida tor-mor keltirdi. Bu turnirdagi eng yirik g‘alaba. 2012 yillar jamoasi esa "Nasaf"ni 2:0 hisobda mag‘lubiyatga uchratdi. Yarim finalda U-13 "Bunyodkor"ni penaltilar seriyasida mag‘lubiyatga uchratdi. Afsuski 2011 yillar Toshkent derbisida 2:0 hisobda oldinda borib, yakunda 3 ta gol o‘tkazib yubordilar. Finalda "Odil Ahmedov" FA yana mag‘lubiyata uchratildi, 2:0. 2011 yillar esa uchinchi o‘rin uchun bahsda "Nasaf"ni 4:2 hisobda mag‘lubiyatga uchratdi.

Bugun esa 2009 va 2010 yillarda tavallud topgan futbolchilar o‘rtasidagi final bosqichi o‘z yakuniga yetdi. Guruh bosqichini 9 ochko bilan yakunlagan ikki jamoamiz chorak finallarda g‘alaba qozondilar. U-16 "Nasaf" ustida 5:2 hisobda g‘alaba qozondi. 2010 yillar esa "Lokomotiv"ni 3:0 hisobida mag‘lub etdilar. 1/2 finalda esa yana Toshkent derbisi, "Paxtakor" - "Bunyodkor". Ikkisida ham g‘alaba. Qiyinchilik bilan finalga yetib kelgan "Nasaf"ni 2010 yillarimiz osonlik bilan mag‘lubiyatga uchratdilar. 2009 yillar finalida g‘alaba qozonish ham jamoamizga ortiqcha qiyinchilik tug‘dirmadi. Guruh o‘yinida "Odil Ahmedov" qanday mag‘lubiyatga uchratilgan bo‘lsa, finalda ham shunday yutildi.

Shu tariqa "Paxtakor" yoshlar va o‘smirlar o‘rtasida o‘tkazilgan 5 ta musobaqaning 4 tasida g‘oliblikni qo‘lga kiritdi, bittasida uchinchi o‘rin bilan kifoyalandi.